25 сакавіка, Мінск /Аліна Грышкевіч - БЕЛТА/. У Турцыі актыўна рыхтуюцца да маючага адбыцца візіту Прэзідэнта Беларусі. Аб гэтым заявіла Надзвычайны і Паўнамоцны Пасол Турцыі ў Беларусі Кезбан Нілвана Дарама, выступаючы сёння ў Доме дружбы на вечары, прысвечаным 27-й гадавіне ўсталявання беларуска-турэцкіх дыпламатычных адносін, перадае карэспандэнт БЕЛТА.
Дыпламат звярнула ўвагу на важнасць абмену візітамі, у тым ліку на вышэйшым узроўні. Яна адзначыла актыўны дыялог і супрацоўніцтва паміж Беларуссю і Турцыяй, адсутнасць якіх-небудзь праблем і супярэчнасцей паміж імі. "Гэта сведчыць аб тым, што ў нас існуюць агульныя падыходы па многіх пытаннях", - лічыць Кезбан Нілвана Дарама.
Пасол Турцыі таксама падзякавала беларусам за вялікую цікавасць да турэцкай мовы, культуры і гісторыі.
У сваю чаргу начальнік галоўнага ўпраўлення Еўропы і Паўночнай Амерыкі Міністэрства замежных спраў Беларусі Андрэй Бушыла падкрэсліў: "Для Беларусі Турцыя заўсёды будзе займаць асаблівае месца. Менавіта Турэцкая Рэспубліка першая прызнала незалежнасць нашай краіны ў 1991 годзе, што стала важным крокам для далейшага міжнародна-прававога станаўлення нашай маладой дзяржавы. Дыпламатычныя адносіны, устаноўленыя паміж нашымі краінамі ў 1992 годзе, заклалі аснову для развіцця двухбаковых кантактаў на ўсіх узроўнях і ва ўсіх сферах".
Ён канстатаваў, што беларуска-турэцкае супрацоўніцтва з самага пачатку будавалася на прынцыпах узаемнага даверу і павагі. Праз больш як чвэрць стагоддзя ўзаемадзеянне дзвюх краін з'яўляецца прыкладам дружалюбнага, канструктыўнага і ўзаемавыгаднага дыялогу.
Андрэй Бушыла таксама адзначыў, што Беларусь разглядае Турцыю ў якасці надзейнага сябра, перспектыўнага партнёра на міжнароднай арэне і выступае за сістэмнае і паступальнае ўмацаванне двухбаковых адносін. На думку дыпламата, пераканаўчым сведчаннем высокага ўзроўню ўзаемадзеяння паміж дзвюма краінамі стаў афіцыйны візіт у Мінск у лістападзе 2016 года Прэзідэнта Турцыі Рэджэпа Таіпа Эрдагана.
"Кіруючыся дамоўленасцямі кіраўнікоў дзяржаў і ўрадаў, нам удалося наблізіць узровень двухбаковага тавараабароту да сумы $1 млрд, у той час як пяць гадоў таму гэты паказчык быў напалову меншы. Гэта сведчыць пра наяўнасць добрага патэнцыялу для далейшага яго павелічэння, вываду эканамічных адносін на новы якасны ўзровень, звязаны з пераходам ад простага гандлю таварамі да больш глыбокіх форм супрацоўніцтва - прамысловай кааперацыі, узаемнага інвесціравання, сумесных навукова-тэхнічных распрацовак", - падкрэсліў Андрэй Бушыла.
Старшыня Беларускага таварыства дружбы і культурнай сувязі з замежнымі краінамі Ніна Іванова падкрэсліла важнасць развіцця і беларуска-турэцкіх культурных сувязей. На вечары гучалі вершы і песні на турэцкай мове, у тым ліку ў выкананні беларускіх студэнтаў.-0-
