9 верасня, Мінск /Кар. БЕЛТА/. Міністэрства замежных спраў Беларусі як Сакратарыят нацыянальнага каардынатара па дасягненні Мэт устойлівага развіцця правяло пасяджэнне Савета па ўстойлівым развіцці пад старшынствам нацыянальнага каардынатара Анатоля Ісачанкі. Аб гэтым БЕЛТА паведамілі ў прэс-службе МЗС.
У мерапрыемстве, якое прайшло ў вочным фармаце, прынялі ўдзел міжнародныя партнёры, прадстаўнікі дзяржаўных органаў і арганізацый, кіраўніцтва Мінска і рэгіёнаў, дэпутацкі корпус, прадстаўнікі грамадскіх аб'яднанняў.
"Удзельнікі пасяджэння абмеркавалі выкананне парадку дня ў галіне ўстойлівага развіцця да 2030 года і ўзнялі пытанне негатыўнага ўплыву аднабаковых прымусовых мер, якія выкарыстоўваюцца заходнімі краінамі, на дасягненне Беларуссю Мэт устойлівага развіцця і забеспячэнне ўстойлівага развіцця дзяржавы", - расказалі ў прэс-службе ведамства.
Паводле даных міжнародных арганізацый, на сённяшні дзень прагрэс Беларусі па выкананні МУР дасягае амаль 79 працэнтаў. У рэйтынгу Мэт устойлівага развіцця Беларусь займае 24-е месца са 165 дзяржаў.-0-
