ДЗЯРЖОРГАНЫДЗЯРЖОРГАНЫ
Флаг Субота, 24 верасня 2022
Мінск Ясна +7°C
Усе навіны
Усе навіны
Палітыка
19 мая 2022, 15:39

У ЕАЭС абмяркоўваюць магчымасць стварыць з ШАС адзіную разліковую валюту і поўнасцю адмовіцца ад долара і еўра

Фота з архіва
Фота з архіва

19 мая, Масква /Эдуард Півавар - БЕЛТА/. У Еўразійскім эканамічным саюзе абмяркоўваюць магчымасць стварыць з Шанхайскай арганізацыяй супрацоўніцтва адзіную разліковую валюту і поўнасцю адмовіцца ад долара і еўра. Аб гэтым паведаміў сёння на прэс-канферэнцыі член Калегіі (міністр) па інтэграцыі і макраэканоміцы Еўразійскай эканамічнай камісіі Сяргей Глазьеў, перадае карэспандэнт БЕЛТА.

"Жыццё нас падвяло сёння да таго, што нам трэба ў плане пашырэння выкарыстання нацыянальных валют наогул адмаўляцца ад тых валют, якія з'яўляюцца таксічнымі, якія з'яўляюцца інструментам санкцыйнага націску, па якіх эмітэнты не выконваюць сваіх абавязацельстваў, парушаюць міжнароднае права. Гэта значыць, размова ідзе аб тым, каб нам наогул адмовіцца ад выкарыстання долара, еўра, фунта, ены - валют краін, якія выкарыстоўваюць сваё манапольнае права на эмісію сусветных рэзервовых валют у палітычных мэтах, нядобрасумленна парушаюць свае абавязацельствы, у тым ліку па ўдзеле ў забеспячэнні валютных рэзерваў", - сказаў Сяргей Глазьеў.

"Адных нашых нацыянальных валют, каб замясціць гэтыя валюты, да якіх страчаны давер, мала, - адзначыў ён. - Мы сёння вядзём размову з нашымі партнёрамі (учора была сустрэча з генеральным сакратаром ШАС), што нам неабходна падумаць аб стварэнні прынцыпова новай мадэлі валютна-фінансавага рэгулявання ў свеце. І для пачатку ў рамках спалучэння ЕАЭС і ініцыятывы "Адзін пояс, адзін шлях", выкарыстоўваючы ў тым ліку патэнцыял ШАС, з якой у нас ёсць мемарандум аб супрацоўніцтве, распрацаваць такую агульную мадэль увядзення новай разліковай сусветнай валюты ў лічбавым фармаце, якая выкарыстоўвалася б выключна ў міжнародных адносінах, была б устойлівай, празрыстай і справядлівай, абароненай ад розных санкцый".

Паводле слоў міністра ЕЭК, мадэль такой валюты, каркас гэтай ідэі плануецца абмеркаваць на Еўразійскім эканамічным форуме 26 мая ў Бішкеку. "Гэта мадэль даволі зразумелая, яна ўключае карзіну валютных рэзерваў краін у нацыянальных валютах, якія ўдзельнічаюць у гэтай новай архітэктуры валютна-фінансавых адносін. Зразумела, усё гэта павінна быць аформлена міжнародным дагаворам. І такі пул нацыянальных валют можа быць зроблены па прыкладзе МВФ, дзе выпушчаны спецыяльныя правы запазычання, так званыя СДР. Гэта першая частка канструкцыі валютнай карзіны пад эмісію новай сусветнай разліковай валюты. Другая частка - гэта таварныя рэзервы, пул біржавых тавараў. Прыкладна 20 біржавых тавараў, якія вырабляюць нашы дзяржавы і якія маглі б стаць лідарамі цэнаўтварэння", - растлумачыў Сяргей Глазьеў.

"Калі нам удасца ўключыць у гэту работу нашых партнёраў - членаў ШАС, то гэта мадэль практычна для ўсёй Азіі, а ў перспектыве - для ўсяго свету. Стабільнасць гэтага інструмента будзе забяспечвацца не даўгавымі абавязацельствамі ЗША або Вялікабрытаніі, як цяпер гэта адбываецца ў ЕС, а рэальнымі таварнымі рэзервамі і прыроднымі рэсурсамі", - падкрэсліў міністр ЕЭК.

Пазней на прэс-канферэнцыі ён асабліва звярнуў увагу на тое, што пакуль у афіцыйным парадку развіцця інтэграцыі тэмы стварэння такой валюты няма: "Мы не маем нейкіх даручэнняў, і ў нашых планах работы ЕЭК не стаіць пытанне аб увядзенні новай валюты". Сяргей Глазьеў дадаў, што пасля абмеркавання мадэлі магчымай валюты на форуме ў Бішкеку будзе зроблены даклад палітычнаму кіраўніцтву краін ЕАЭС.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі