6 лютага, Мінск /Кар. БЕЛТА/. Міністр замежных спраў Беларусі Уладзімір Макей не выключае магчымасці павелічэння ў перспектыве тэрмінаў бязвізавага знаходжання іншаземцаў у Беларусі. Аб гэтым ён заявіў у час сустрэчы Прэзідэнта Беларусі Аляксандра Лукашэнкі з прадстаўнікамі грамадскасці, беларускіх і замежных СМІ, перадае карэспандэнт БЕЛТА.
Рашэнне будзе прынята ў тым выпадку, калі гэта будзе мэтазгодным.
"Што датычыцца тэрмінаў, былі і радыкальныя прапановы. Дапусцім, тыя, хто прыязджае ў беларускія санаторыі, маглі б застацца там на 10-15 дзён. Не сакрэт, што МЗС выступала за больш ліберальныя прапановы. Але ў нас захаваўся інстытут рэгістрацыі іншаземцаў, якія знаходзяцца ў Беларусі больш за 5 дзён, такі рэжым існуе і ў некаторых іншых дзяржавах. Мы вырашылі пакуль не ламаць сістэму, а ісці паступова", - растлумачыў Уладзімір Макей.
Паводле яго слоў, пяці дзён дастаткова, каб турыст мог паглядзець краіну, а бізнесмены правялі перагаворы. "Калі мы ўбачым, што гэты рэжым пачаў працаваць, то будзем думаць над тым, каб прапанаваць больш працяглыя перыяды знаходжання іншаземцаў у нашай краіне", - адзначыў Уладзімір Макей.
Гаворачы аб рэакцыі Расіі на ўвядзенне Беларуссю пяцідзённага бязвізавага рэжыму, Уладзімір Макей падкрэсліў, што краіна не ўтойвала падрыхтоўку гэтага ўказа. "Мы гаварылі аб гэтым і на кансультацыях паміж міністэрствамі замежных спраў, у друку гэта было, таму тут няма ніякай закрытай інфармацыі", - заявіў ён. Міністр звярнуў увагу, што запуск бязвізавага рэжыму "не стварае ніякіх пагроз для беларуска-расійскай граніцы".
Як паведамлялася, Беларусь з 12 лютага ўводзіць пяцідзённы бязвізавы рэжым для грамадзян 80 краін. Ён распаўсюджваецца на 39 краін Еўропы, уключаючы ўвесь Еўрасаюз, а таксама Бразілію, Інданезію, ЗША, Японію і іншыя дзяржавы. Абавязковай умовай бязвізавага наведвання з'яўляецца прыбыццё ў краіну праз Нацыянальны аэрапорт Мінск. Сваю поўную падтрымку рашэння Беларусі запусціць 5-дзённы бязвізавы рэжым выказала Сусветная турысцкая арганізацыя.-0-
