28 кастрычніка, Мінск /Кар. БЕЛТА/. Краіны СНД павінны дапамагаць адна адной і разам пераадольваць цяжкасці. Аб гэтым заявіў Прэзідэнт Казахстана Касым-Жамарт Такаеў на сустрэчы ў Астане з членамі Савета кіраўнікоў урадаў СНД, у тым ліку прэм'ер-міністрам Беларусі Раманам Галоўчанкам, паведамляе карэспандэнт БЕЛТА.
"Галоўны акцэнт у нашай агульнай рабоце зроблены на ўмацаванні даверу і бяспекі ў рэгіёне, стварэнні ўмоў для пашырэння эканамічнага партнёрства, павышэння аўтарытэту Садружнасці. Літаральна нядаўна адбыўся саміт кіраўнікоў дзяржаў СНД. Мы зафіксавалі наша агульнае імкненне да таго, каб нарочшваць узаемнае супрацоўніцтва ў рамках аб'яднання, садзейнічаць умацаванню патэнцыялу Садружнасці. Але вы ведаеце, якім чынам цяпер складваецца абстаноўка на сусветных рынках. Турбулентнасць, геапалітычная напружанасць, негатыўныя наступствы якой мы ўсе адчуваем. Дзяржавы СНД павінны супрацоўнічаць, дапамагаць адзін аднаму, каб пераадолець цяперашнія цяжкасці", - сказаў Касым-Жамарт Такаеў.
Асаблівае месца ў супрацоўніцтве займае гандлёва-эканамічнае ўзаемадзеянне. "Нягледзячы на крызісныя з'явы на міжнародных рынках, эканоміка нашых краін паступова аднаўляецца. Лічу, акцэнт трэба зрабіць на ўстараненні бар'ераў, недапушчэнні пратэкцыянізму, стварэнні спрыяльных тарыфных умоў, спрашчэнні адміністрацыйных працэдур", - лічыць Прэзідэнт Казахстана.
Эфектыўная гандлёва-эканамічная кааперацыя ў Садружнасці цесна звязана з развіццём транзітна-транспартнага патэнцыялу. "Гэта тэма становіцца ўсё больш актуальнай. Краіны СНД маглі б сумесна працаваць над развіццём існуючага патэнцыялу, у прыватнасці, па развіцці гандлю ў напрамку Поўнач-Поўдзень. Цяпер шмат гаворыцца аб Транскаспійскім міжнародным транспартным маршруце, ён таксама па-свойму перспектыўны. Задача выхаду на міжнародныя рынкі цяпер становіцца ўсё больш актуальнай", - падкрэсліў Касым-Жамарт Такаеў.-0-
