17 студзеня, Мінск /Кар. БЕЛТА/. Спецпрадстаўнік АБСЕ ў трохбаковай кантактнай групе па ўрэгуляванні сітуацыі на ўсходзе Украіны Хайдзі Грау заклікаў бакі канфлікту ўзмацніць процімінную дзейнасць. Аб гэтым дыпламат заявіла, падводзячы вынікі пасяджэння ТКГ, якое прайшло 16 студзеня ў Мінску, перадае карэспандэнт БЕЛТА.
Галоўнай прычынай гібелі сярод грамадзянскага насельніцтва застаюцца міны, канстатавала Хайдзі Грау. "У сувязі з гэтым заклікаю бакі ўзмацніць процімінную дзейнасць", - сказала яна.
У 2019 годзе колькасць грамадзянскіх ахвяр значна зменшылася і дасягнула самага нізкага ўзроўню з пачатку канфлікту. У студзені 2020 года ў параўнанні з канцом 2019-га прыкметна скарацілася колькасць парушэнняў рэжыму спынення агню. Асабліва важна адзначыць, што ў мінулым годзе не загінула ніводнае дзіця, падкрэсліла спецпрадстаўнік.
Хайдзі Грау дадала, што вітае праведзены ў канцы снежня абмен людзьмі, якія ўтрымліваліся. "Гэта стала вялікім прарывам і фактарам, які ўмацоўвае давер паміж бакамі", - адзначыла яна.
16 студзеня адбылося першае ў гэтым годзе пасяджэнне ТКГ і яе рабочых груп. "Наша работа была ў асноўным арыентавана на імплементацыю рашэнняў, замацаваных на "нармандскім саміце" ў Парыжы", - праінфармавала Хайдзі Грау.
Асноўнай тэмай дыскусіі рабочай групы па бяспецы было вызначэнне дадатковых участкаў развядзення сіл і сродкаў. Гуманітарная рабочая група падвяла вынікі абмену людзьмі, якія ўтрымліваліся. Ён адбыўся 29 снежня 2019 года. Эканамічная група абмеркавала пытанні водазабеспячэння праз лінію сутыкнення ў асобных раёнах Данецкай і Луганскай абласцей.
Палітычная рабочая група займалася пытаннямі асаблівага статусу АРДВ і АРЛВ, імплементацыяй формулы Штайнмаера ва ўкраінскае заканадаўства.
Наступнае пасяджэнне ТКГ адбудзецца 29 студзеня.-0-