23 снежня, Масква /Эдуард Півавар - БЕЛТА/. Асноўная мэта санкцыйнага націску Захаду на Беларусь і Расію - парушыць палітычную і эканамічную стабільнасць у абедзвюх краінах. Аб гэтым заявіў журналістам старшыня Пастаяннай камісіі Савета Рэспублікі Нацыянальнага сходу Беларусі па заканадаўстве і дзяржаўным будаўніцтве Сяргей Сівец у кулуарах праведзенага сёння ў Маскве другога пасяджэння 61-й сесіі Парламенцкага сходу Саюза Беларусі і Расіі, перадае карэспандэнт БЕЛТА.
"І Расія, і Беларусь цяпер знаходзяцца пад жорсткім санкцыйным націскам так званага калектыўнага Захаду, - канстатаваў Сяргей Сівец. - Асноўная мэта гэтага націску, які ідзе ўразрэз з агульнапрынятымі прынцыпамі і нормамі міжнароднага права, - гэта парушыць грамадска-палітычную і сацыяльна-эканамічную стабільнасць у нашых дзяржавах. Таму тыя рашэнні, якія прымаюцца на ўзроўні Парламенцкага сходу, будуць якраз накіраваны на тое, каб эфектыўна процідзейнічаць гэтым дэструктыўным праяўленням і ў канчатковым выніку закласці яшчэ адну прыступку далейшага эвалюцыйнага, паступальнага развіцця і паглыблення саюзнага будаўніцтва".
Ён адзначыў, што саюзныя парламентарыі актыўна ўключыліся ў рэалізацыю 28 саюзных праграм па паглыбленні інтэграцыі, якія былі прыняты 4 лістапада Вышэйшым дзяржсаветам Саюзнай дзяржавы. "Маштабнасць гэтай задачы прадугледжвае прыняцце комплексу сістэмных мер, якія маюць як арганізацыйны, прававы, так і фінансавы характар", - сказаў парламентарый.
Сяргей Сівец падкрэсліў, што саюзныя парламентарыі пачалі ўжо вырашэнне пытанняў, звязаных з фінансаваннем маштабных праектаў, якія датычацца ваенна-тэхнічнага супрацоўніцтва, пагранічнай бяспекі, праваахоўнай дзейнасці. "Гэта ўсё тое, што фактычна накіравана на забеспячэнне і ўмацаванне суверэнітэту абедзвюх дзяржаў і ў цэлым Саюзнай дзяржавы", - дадаў ён.
Сёння на пасяджэнні саюзныя парламентарыі прынялі праект бюджэту Саюзнай дзяржавы на 2022 год, унеслі змяненні ў бюджэт СД на бягучы год. Была зменена структура Парламенцкага сходу: колькасць яго пастаянных камісій павялічана з 8 да 12. Акрамя таго, саюзныя парламентарыі зацвердзілі план работы Парламенцкага сходу і план яго міжнароднай дзейнасці на 2022 год.
Першае пасяджэнне сесіі прайшло ў Мінску 2 снежня. На ім Вячаслаў Валодзін быў перавыбраны кіраўніком Парламенцкага сходу, былі пацверджаны і паўнамоцтвы расійскай дэпутацыі. Таксама была прынята заява ў сувязі з сітуацыяй на беларуска-польскай граніцы. У ёй саюзныя парламентарыі заклікалі Парламенцкую асамблею Савета Еўропы (ПАСЕ), Парламенцкую асамблею АБСЕ, Еўрапарламент і іншыя структуры Еўрасаюза прыняць канкрэтныя меры па ўрэгуляванні крызісу.-0-