13 лютага, Мінск /Кар. БЕЛТА/. Неабходна рабіць усё магчымае для супрацоўніцтва Беларусі і Венгрыі на карысць дзвюх краін. Гэта адзначыў міністр замежных спраў і знешняга гандлю Венгрыі Петэр Сіярта 13 лютага ў Мінску на сустрэчы з кіраўніком беларускага знешнепалітычнага ведамства Сяргеем Алейнікам, паведамляе карэспандэнт БЕЛТА.
"Сёння мы сутыкаемся з новымі выклікамі часу, - падкрэсліў міністр. - У нас вельмі вузкі калідор магчымасцей у плане супрацоўніцтва. Але мы павінны рабіць усё магчымае для супрацоўніцтва на карысць нашых краін".
Ён таксама закрануў украінскую тэму і яе ўплыў на сусветныя працэсы, а таксама важнасць мірнага ўрэгулявання канфлікту.
У Міністэрстве замежных спраў нашай краіны адбудзецца таксама падпісанне двухбаковых дакументаў. Акрамя таго, плануецца сустрэча з прадстаўнікамі сродкаў масавай інфармацыі.
Дыпламатычныя адносіны паміж Рэспублікай Беларусь і Венгрыяй устаноўлены 12 лютага 1992 года. Пасольства Беларусі ў Венгрыі адкрыта ў студзені 2000 года, венгерскае пасольства ў Мінску - у снежні 2007 года.-0-
