1 сакавіка, Пекін /Кар. БЕЛТА/. Новы статус двухбаковых адносін з Беларуссю павінен напаўняцца новым зместам. Аб гэтым Старшыня КНР Сі Цзіньпін заявіў на перагаворах з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
"Ад усёй душы вітаю вас, спадар Прэзідэнт, у Кітаі. Сустрэча паміж даўнімі сябрамі заўсёды толькі радуе. Мы з вамі сустракаліся апошні раз у мінулым годзе ў верасні ў Самаркандзе. У нас была вельмі добрая размова, у ходзе якой намі было абвешчана аб вывядзенні кітайска-беларускіх адносін на ўзровень усепагоднага і ўсебаковага стратэгічнага партнёрства, што паслужыла магутным штуршком для поўнамаштабнага супрацоўніцтва дзвюх краін. Новы статус двухбаковых адносін павінен напаўняцца новым зместам. Сёння ў нас добрая магчымасць распрацаваць план па ўсім комплексе двухбаковых адносін і прыняць сумесную заяву", - сказаў кітайскі лідар.
Ён выказаў упэўненасць, што візіт Прэзідэнта Беларусі будзе вельмі плённым.
"Мяне са спадаром Прэзідэнтам аб'ядноўвае агульнае імкненне да развіцця кітайска-беларускіх адносін. Мы ўжо дружым не першы год. У нас трывалая непарушная дружба. Ва ўмовах нестабільнасці і турбулентнасці міжнароднай абстаноўкі Кітай актыўна настроены на прадаўжэнне сумесных намаганняў з Беларуссю па ўмацаванні палітычнага ўзаемадаверу і практычнага супрацоўніцтва ў інтарэсах дынамічнага, здаровага і ўстойлівага развіцця двухбаковых адносін", - заявіў Сі Цзіньпін.-0-
