16 лістапада, Бабруйск /Кар. БЕЛТА/. Планамернае нарошчванне ваеннай сілы НАТА ў Еўропе пачалося яшчэ ў 2017 годзе. Аб гэтым у час сустрэчы з працоўнымі калектывамі Бабруйска па актуальных пытаннях існуючай ваенна-палітычнай абстаноўкі заявіў кіраўнік Адміністрацыі Прэзідэнта Ігар Сергяенка, перадае карэспандэнт БЕЛТА.
"За апошнія пяць гадоў колькасць воінскіх фарміраванняў НАТА ва Усходняй Еўропе вырасла з 12 тыс. да 35 тыс. - у тры разы. А ў цэлым у Еўропе - да 60 тыс. Колькасць авіяцыі павялічылася ў пяць разоў. Гэта ўсё пачалося з 2017 года і раней. Гэта сведчыць аб планамерным нарошчванні ваеннай сілы", - сказаў Ігар Сергяенка.
Кіраўнік Адміністрацыі Прэзідэнта адзначыў, што спецыяльная ваенная аперацыя ва Украіне паскорыла гэтыя працэсы. У Прыбалтыцы таксама складваецца няпростая сітуацыя. З пункту гледжання разгортвання воінскіх кантынгентаў там іншая спецыфіка, але ваенная актыўнасць там не меншая.
"Жывучы звычайным жыццём, працуючы на вытворчасці, неабходна разумець, якая няпростая складваецца карціна. Актывізацыя інфармацыйна-псіхалагічнай вайны - гэта рэаліі сённяшняга дня", - заявіў Ігар Сергяенка.
Ён звярнуў увагу, што на тэрыторыі Украіны існуе некалькі цэнтраў інфармацыйна-псіхалагічнай вайны. Яны ствараюць ролікі, падобныя на тыя, дзе былі паказаны нібыта зверствы расійскіх войскаў у Бучы. "Гэтыя спробы не спыняюцца. Дакладна гэтак жа вясной бягучага года спрабавалі справакаваць нас, беларускі бок, на нейкую рэакцыю шляхам укіду інфармацыі, што расійскія самалёты скідвалі бомбы не толькі на Украіну, але і на прыгранічныя тэрыторыі ў Брэсцкай вобласці. Мы аператыўна ў гэтым разбіраліся, і гэта інфармацыя не пацвердзілася. Але з таго боку былі задзейнічаны кіраўнікі даволі высокага ўзроўню, каб давесці гэту інфармацыю", - расказаў Ігар Сергяенка.
Акрамя таго, сёння раніцай у інтэрнэце з'явілася інфармацыя, што расійская ракета прыляцела на сумежную з Украінай тэрыторыю Польшчы і прывяла да знішчэння збожжасховішча і гібелі двух мясцовых жыхароў. "Байдэн заявіў, што папярэдняя інфармацыя ўказвае на тое, што яна не была запушчана з тэрыторыі Расіі, але яны будуць разбірацца. Палякі адразу ж заявілі, што гэта расіяне. Сёння прэзідэнт Польшчы склікае экстраннае пасяджэнне Савета нацыянальнай бяспекі. Каму гэта выгадна? Незразумела, што за гэтым стаіць. Можа, звычайная нядбайнасць. Зразумела, што гэта сітуацыя выгадная Украіне. І абсалютна не патрэбна Расіі. І такія сітуацыі з'яўляюцца даволі часта. Усё неадназначна і няпроста", - рэзюмаваў Ігар Сергяенка.-0-
