3 сакавіка, Мінск /Кар. БЕЛТА/. Турцыя была і застаецца нашым стратэгічным партнёрам, заявіў журналістам старшыня Пастаяннай камісіі па міжнародных справах Палаты прадстаўнікоў Андрэй Савіных, перадае карэспандэнт БЕЛТА.
Сёння адбылася сустрэча старшыні Палаты прадстаўнікоў Уладзіміра Андрэйчанкі з Надзвычайным і Паўнамоцным Паслом Турэцкай Рэспублікі ў Рэспубліцы Беларусь Мустафой Азджанам.
"Перш за ўсё хачу адзначыць вельмі высокі ўзровень дасягнутых адносін паміж Беларуссю і Турцыяй. І галоўнае, што дынаміка вельмі пазітыўная ўжо на працягу многіх гадоў. Мне здаецца, што залогам поспеху служаць некалькі фактараў. Па-першае, гэта пастаянны дыялог на вышэйшым узроўні паміж кіраўнікамі нашых дзяржаў, які закладвае напрамкі і рамкі ўзаемадзеяння. Па-другое, гэта пастаянны дыялог паміж ключавымі міністэрствамі і ў рамках тых камісій і камітэтаў па двухбаковым супрацоўніцтве, якія створаны паміж краінамі. Гэта і міжурадавая камісія, і камітэт па ўзаемадзеянні ў сферы навукі і тэхналогій і многія іншыя, - сказаў Андрэй Савіных. - Нарэшце, гэта кантакты паміж дзелавымі коламі. Мы бачым рост тавараабароту. Дынаміка вельмі станоўчая. Я перакананы, што Турцыя была і застаецца нашым стратэгічным партнёрам".
Парламентарый дадаў, што пасля разбуральных землетрасенняў Беларусь аказала Турцыі тую дапамогу, якая была патрэбна ёй больш за ўсё. "Гэта дапамога прафесійна абучанымі спецыялістамі, якія ведаюць, як ліквідаваць наступствы такіх катастроф, ведаюць, як змагацца з наступствамі землетрасенняў. Нашы прафесіяналы з адпаведным абсталяваннем працавалі дзень і ноч па выратаванні людзей з-пад завалаў", - падкрэсліў дэпутат.-0-
