2 снежня, Мінск /Кар. БЕЛТА/. Саюзнай дзяржаве трэба паслаць свету дакладны сігнал, што мы адзіныя і гатовы да пераадолення ўсіх цяжкасцей, заявіў журналістам старшыня Пастаяннай камісіі па міжнародных справах Палаты прадстаўнікоў, намеснік старшыні Парламенцкага сходу Саюза Беларусі і Расіі Андрэй Савіных, перадае карэспандэнт БЕЛТА.
"Сітуацыя, якая сёння складваецца ў свеце, - гэта сітуацыя нестабільнасці, звязаная з ростам напружанасці. Таму каардынацыя пазіцыі і сумесных заяў па ўсіх актуальных пытаннях міжнароднага парадку дня становіцца проста неабходнай. Нам трэба паслаць свету дакладны сігнал: мы разам, мы адзіныя і мы гатовы да пераадолення ўсіх цяжкасцей", - сказаў Андрэй Савіных.
Парламентарый адзначыў, што сесія Парламенцкага сходу праходзіць у вельмі важны перыяд. "Развіццё Саюзнай дзяржавы выходзіць на новы якасны ўзровень, а ён, без усякага сумнення, запатрабуе вельмі цеснай каардынацыі паміж парламентамі дзвюх краін для таго, каб забяспечыць эфектыўны заканатворчы працэс, які не будзе адставаць ад тэмпаў інтэграцыі на ўзроўні галін і розных сектараў", - падкрэсліў ён.
Андрэй Савіных дадаў, што Саюзная дзяржава - унікальнае аб'яднанне. "Сёння мы знаходзімся ў такім перыядзе гістарычнага развіцця, калі ўсе краіны аб'ядноўваюцца ў саюзы суверэнных дзяржаў для таго, каб больш эфектыўна і вынікова адстойваць і свае знешнепалітычныя задачы, вырашаць праблемы развіцця. Без усякага сумнення, Саюзная дзяржава - гэта ўнікальны вопыт, які дае магчымасць істотна паскорыць вельмі многія працэсы. Усе яны працуюць на павышэнне стабільнасці, на рост дабрабыту і ўзроўню жыцця нашых краін", - канстатаваў ён.
Сёння ў Мінску пройдзе пасяджэнне шэсцьдзесят першай сесіі Парламенцкага сходу Саюза Беларусі і Расіі. На пасяджэнні будуць прызнаны паўнамоцтвы дэпутатаў Парламенцкага сходу, дэлегаваных Саветам Федэрацыі і Дзяржаўнай Думай Федэральнага сходу Расіі, пройдуць выбары старшыні і намесніка старшыні Парламенцкага сходу. Акрамя таго, зацверджаны новыя склады камісій і выбраны старшыні і намеснікі старшынь камісій. Адно з галоўных пытанняў парадку дня сесіі - абмеркаванне мер, накіраваных на выкананне дэкрэта Вышэйшага дзяржаўнага савета СД ад 4 лістапада 2021 года нумар 6 "Аб Асноўных напрамках рэалізацыі палажэнняў Дагавора аб стварэнні Саюзнай дзяржавы на 2021-2023 гады".-0-
