Сцяг Серада, 24 красавіка 2024
Усе навіны
Усе навіны
Палітыка
09 студзеня 2023, 14:06

Саюзныя праграмы, адмена роўмінгу і сімволіка. Мезенцаў расказаў аб парадку дня маючага адбыцца пасяджэння ВДС

9 студзеня, Мінск /Кар. БЕЛТА/. Дзяржаўны сакратар Саюзнай дзяржавы Дзмітрый Мезенцаў пасля сустрэчы з Прэзідэнтам Беларусі Аляксандрам Лукашэнкам расказаў журналістам аб парадку дня маючага адбыцца пасяджэння Вышэйшага дзяржаўнага савета, перадае карэспандэнт БЕЛТА.

Паводле слоў Дзмітрыя Мезенцава, бліжэйшыя пасяджэнні Савета Міністраў Саюзнай дзяржавы і Вышэйшага дзяржаўнага савета будуць прысвечаны аналізу пройдзенага шляху і выпрацоўцы новых задач, якія "падкрэсляць глыбіню і маштаб інтэграцыйнага саюзніцкага ўзаемадзеяння".

"Я прадставіў Прэзідэнту прапановы ў парадак дня Вышэйшага дзяржаўнага савета. Яны былі прынцыпова падтрыманы. Гэта ў тым ліку і пытанне аб выніках гандлёва-эканамічнага ўзаемадзеяння за справаздачны перыяд, даклад урадаў аб тым, што зроблена па рэалізацыі 28 саюзных праграм. Мне здаецца, супрацоўніцтва рэспубліканскіх і федэральных ведамстваў ідзе паспяхова. Яно ідзе, вядома, са змястоўнымі спрэчкамі, але ў духу сапраўднай таварыскасці і ўзаемадзеяння. І вядома, мы прапануем і просім зацвердзіць Канцэпцыю інфармацыйнай бяспекі як пэўны адказ на змяненні той абстаноўкі ў рэгіёне Усходняй Еўропы", - сказаў дзяржсакратар Саюзнай дзяржавы.

У парадку дня пасяджэння ВДС будуць таксама пытанні, якія датычацца бюджэту Саюзнай дзяржавы, новага фармату рэалізацыі нарматыўных актаў, якія рэгламентуюць дзейнасць Беларусі і Расіі ў саюзным фармаце.

"Вядома, мы ўзнімем пытанне аб адмене роўмінгу. Гэта работа павінна завяршацца - было даручэнне прэзідэнтаў. Мы таксама прапанавалі прэзідэнтам разгледзець пытанне аб сімволіцы Саюзнай дзяржавы. Перакананы ў тым, што тыя даручэнні, якія будуць дадзены, дадуць магчымасць калектыўным, грамадскім меркаваннем вызначыць той сцяг, той гімн, якія будуць адпавядаць таму этапу адносін, які ёсць сёння паміж Беларуссю і Расіяй", - падкрэсліў Дзмітрый Мезенцаў.

Разам з тым дата маючага адбыцца пасяджэння Вышэйшага дзяржаўнага савета яшчэ не вядома. Паводле слоў Аляксандра Лукашэнкі, з гэтым пытаннем яшчэ будзе неабходна вызначыцца.

"Шчыра кажучы, нам трэба актуалізаваць парадак дня Саюзнай дзяржавы і пачаць з таго, каб падвесці вынікі пройдзенага шляху, намеціць планы на будучае. Для гэтага трэба вышэйшыя органы нашай Саюзнай дзяржавы ў вочным фармаце ўжо сабраць і правесці адпаведнае пасяджэнне. Я думаю, што можна было б выбраць алгарытм таго, што Саўмін правядзе сваё пасяджэнне, і па выніках вызначым час пасяджэння Вышэйшага дзяржаўнага савета, які пройдзе на ўзроўні вышэйшых службовых асоб нашай Саюзнай дзяржавы", - адзначыў Прэзідэнт на сустрэчы з Дзмітрыем Мезенцавым.

Пры гэтым кіраўнік дзяржавы падкрэсліў, што галіновыя праграмы ў Саюзнай дзяржаве ні ў якім разе скарачаць нельга. "Эканамічныя, навуковыя, гуманітарныя і іншыя праграмы, якія мы фінансуем. Скарачаць ні ў якім разе нельга. Трэба толькі павялічваць фінансаванне, паклаўшы ў аснову найбольш актуальныя прынцыпы і напрамкі нашай работы ў эканоміцы: імпартазамяшчэнне і гэтак далей. Тое, што трэба цяпер нашым дзяржавам, - і Беларусі, і Расіі ў тым ліку", - заявіў Аляксандр Лукашэнка.

Беларусь і Расія цяпер рэалізуюць саюзныя праграмы, зацверджаныя дэкрэтам Вышэйшага дзяржаўнага савета 4 лістапада 2021 года. На 1 студзеня 2023 года 28 саюзных праграм выкананы на 67,8 працэнта. У поўным аб'ёме рэалізаваны 7 праграм: па інтэграцыі інфармацыйных сістэм дзяржаўных кантралюючых органаў па прасочвальнасці тавараў; па інтэграцыі інфармацыйных сістэм транспартнага кантролю; па гарманізацыі валютнага рэгулявання і валютнага кантролю; па гарманізацыі патрабаванняў у галіне процідзеяння адмыванню грошай і фінансаванню тэрарызму для фінансавага сектара; па ўніфікацыі рэгулявання бухгалтарскага ўліку; па інтэграцыі інфармацыйных сістэм дзяржаўных кантралюючых органаў у частцы ветэрынарнага і каранціннага фітасанітарнага кантролю; па развіцці атамнай энергетыкі.

На заключным этапе знаходзіцца выкананне саюзнай праграмы ў сферы гарманізацыі падатковага і мытнага заканадаўства.-0-

Падпісвайцеся на нас у
Twitter
Топ-навіны
Свежыя навіны Беларусі