2 лютага, Масква /Эдуард Півавар - БЕЛТА/. Парламенцкія слуханні Парламенцкага сходу Саюза Беларусі і Расіі "Актуальныя пытанні міграцыйнай палітыкі: практычныя рашэнні і перспектывы заканадаўчага рэгулявання" плануецца правесці ў красавіку ў Мінску. Аб гэтым паведаміў старшыня Камісіі Парламенцкага сходу Саюза Беларусі і Расіі па міжнародных справах, міграцыйнай палітыцы і сувязях з суайчыннікамі, старшыня Пастаяннай камісіі па міжнародных справах і нацыянальнай бяспецы Савета Рэспублікі Сяргей Рачкоў, перадае карэспандэнт БЕЛТА.
"Прапануецца правесці парламенцкія слуханні ў Мінску 7 красавіку ў Авальнай зале Дома ўрада", - сказаў Сяргей Рачкоў сёння ў Маскве на пашыраным пасяджэнні Камісіі Парламенцкага сходу па міжнародных справах, міграцыйнай палітыцы і сувязях з суайчыннікамі з удзелам парламентарыяў Парламенцкай асамблеі АДКБ.
"Мэтай парламенцкіх слуханняў павінна быць абмеркаванне актуальных праблем міжнароднай міграцыі і новых выклікаў і пагроз, якія з'явіліся ў сувязі з гэтым, а таксама выпрацоўка практычных рэкамендацый адносна кіравання міграцыйнымі працэсамі і канкрэтных мер, якія могуць падтрымаць парламентарыі ў рамках рэалізацыі міграцыйнай палітыкі", - адзначыў парламентарый.
Паводле яго слоў, да ўдзелу ў мерапрыемстве запрашаюцца прадстаўнікі Парламенцкай асамблеі АДКБ і Парламенцкай асамблеі СНД, кіраўнікі міграцыйных службаў, вядучыя эксперты, прадстаўнікі навуковай супольнасці Беларусі і Расіі.
"Міграцыйная тэматыка - адно з актуальных пытанняў сённяшніх міжнародных адносін. Міграцыйныя крызісы, якія закранулі асобныя краіны і цэлыя рэгіёны, патрабуюць прапрацоўкі новых рашэнняў па іх пераадоленні і каардынацыі шматбаковага супрацоўніцтва. Сёння міграцыя разглядаецца не толькі як адзін з актуальных выклікаў, але і як важны драйвер у галіне сацыяльна-эканамічнага развіцця. Патрэбны пошук механізмаў аптымізацыі і кантролю, у тым ліку і на заканадаўчым узроўні, над працэсамі міграцыі для павышэння іх пазітыўнага ўкладу ў сацыяльна-эканамічнай сферы пры ўліку нацыянальных інтарэсаў і прыярытэтаў", - падкрэсліў Сяргей Рачкоў.-0-
