20 снежня, Мінск /Кар. БЕЛТА/. З пачатку 2018 года (па 17 снежня) колькасць грамадзянскіх ахвяр у зоне канфлікту ў Данбасе скарацілася ўдвая ў параўнанні з тым жа перыядам мінулага года. Аб гэтым сёння журналістам паведаміў спецпрадстаўнік АБСЕ ў трохбаковай кантактнай групе Марцін Сайдзік, падводзячы вынікі адыходзячага года, перадае карэспандэнт БЕЛТА.
Марцін Сайдзік удакладніў, што размова ідзе пра 43 забітых і 182 параненых. Колькасць параненых скарацілася на 52 працэнты і дасягнула самага нізкага ўзроўню з пачатку канфлікту. Дабіцца такой прыкметнай тэндэнцыі ўдалося ў тым ліку дзякуючы аб'яўленню ў Данбасе школьных, хлебных, навагодніх і іншых перамір'яў.
У той жа час дыпламат падкрэсліў, што "нават адна чалавечая ахвяра - гэта вельмі шмат". "На жаль, застаюцца і трывожныя тэндэнцыі. Паводле даных няўрадавых арганізацый, прыкладна 7 тыс. кв.км на ўсходзе Украіны замініравана і забруджана іншымі выбуховымі ўстройствамі. Атрымліваецца, што гэта адна з самых замініраваных тэрыторый свету", - канстатаваў Марцін Сайдзік. Ён перакананы, што сітуацыя ў зоне канфлікту магла бы быць яшчэ лепей. "Расійскай Федэрацыі і Украіне трэба працаваць над двухбаковымі адносінамі, трэба палепшыць іх", - сказаў пасол.
Пытанні гарантавання бяспекі і рэжыму спынення агню былі ключавымі ў дыскусіях ТКГ і рабочай групы па бяспецы. "Бакі пацвердзілі прыхільнасць да раней задэклараванага ўстойлівага і поўнага рэжыму спынення агню. Каб канчаткова ўзгадніць мадальнасці перамір'я ў сувязі з навагоднімі і каляднымі святамі па даручэнні ТКГ 27 снежня адбудзецца пазачарговае пасяджэнне рабочай групы па бяспецы ў фармаце відэаканферэнцыі", - праінфармаваў спецпрадстаўнік.
Гуманітарная рабочая група прадоўжыла разглядаць пытанні, звязаныя з абменам утрымліваемымі і пошукам прапаўшых без вестак. Тэмай дыскусіі стала таксама перадача затрыманых, не звязаных з канфліктам у АРЛВ і АРДВ (асобныя раёны Луганскай і Данецкай абласцей), на тэрыторыю, падкантрольную ўраду Украіны. Марцін Сайдзік нагадаў, што 12 і 13 снежня ўжо адбылася перадача такіх затрыманых з АРЛВ і АРДВ - 42 і 13 чалавек адпаведна. З АРЛВ такая перадача адбылася ўпершыню. Дыпламат вітаў гэты крок і выказаў надзею, што працэс паспяхова прадоўжыцца ў будучым.
Удзельнікі эканамічнай рабочай групы абмеркавалі, у прыватнасці, актуальныя пытанні водазабеспячэння ў сістэмах "Карбаніт" і "Вада Данбаса" па абодва бакі ад лініі сутыкнення, выплаты пенсій.
Палітычная рабочая група прадоўжыла абмеркаванне імплементацыі формулы Штайнмаера, амністыі і мадальнасці мясцовых выбараў у АРЛВ і АРДВ, прадугледжаныя мінскімі пагадненнямі.
Наступнае пасяджэнне ТКГ адбудзецца 16 студзеня.-0-
