ДЗЯРЖОРГАНЫДЗЯРЖОРГАНЫ
Флаг Панядзелак, 30 студзеня 2023
Мінск Суцэльная воблачнасць -2°C
Усе навіны
Усе навіны
Палітыка
31 кастрычніка 2022, 20:00

Рыбакоў: даклад ІКАО па расследаванні інцыдэнту з Ryanair мае шмат памылак, недакладнасцей і неаб'ектыўных падыходаў

Фота з архіва
Фота з архіва

31 кастрычніка, Мінск /Кар. БЕЛТА/. На працягу вось ужо многіх гадоў супраць Рэспублікі Беларусь заходнімі дзяржавамі вядзецца шырокамаштабная вайна - палітычная, эканамічная, інфармацыйная. Аб гэтым заявіў пастаянны прадстаўнік Беларусі пры ААН Валянцін Рыбакоў на пасяджэнні Савета Бяспекі ААН па тэме інцыдэнту з Ryanair, паведамляе карэспандэнт БЕЛТА.

"У парушэнне Статута ААН, міжнароднага права выкарыстоўваецца эканамічны тэрарызм - уведзены шматлікія санкцыі з мэтай эканамічнага ўдушэння краіны і яе народа. Груба парушаны ў тым ліку і палажэнні Будапешцкага мемарандума, на які ў гэтай зале так часта любяць спасылацца некаторыя дэлегацыі і па якім Беларусь добраахвотна адмовілася ад валодання самай сучаснай на той момант ядзернай зброяй, так у выніку нічога ўзамен і не атрымаўшы".

"Правядзенне сённяшняга пасяджэння - чарговае праяўленне гэтай вайны", - заявіў Валянцін Рыбакоў.

"Само стварэнне рабочай групы ІКАО па расследаванні з мэтай устанаўлення фактаў адносна выпадку з самалётам авіякампаніі Ryanair у паветранай прасторы Беларусі 23 мая 2021 года супярэчыць мандату арганізацыі і стварае небяспечны прэцэдэнт у маніпуляванні асновамі бяспекі грамадзянскай авіяцыі, - прадоўжыў Валянцін Рыбакоў. - Згаданы даклад, у спешцы напісаны пад націскам асобных краін Захаду, з'яўляецца некансэнсусным, прадузятым і мае неаб'ектыўны характар, на што звернута ўвага і ўдзельнікамі 41-й сесіі Асамблеі ІКАО, якая нядаўна адбылася. Пазіцыя Рэспублікі Беларусь адносна даклада распаўсюджана сакратарыятам, пра што сёння гаварылася, у якасці афіцыйнага дакумента Генеральнай асамблеі па пункце 88 парадку дня "Умацаванне і заахвочванне міжнароднага дагаворнага рэжыму" ад 27 ліпеня 2022 года пад нумарам А/76/909".

Пры гэтым пастаянны прадстаўнік Беларусі заявіў, што "Беларусь ніколі не згодзіцца з высновамі даклада, які заснаваны на няпоўнай інфармацыі пры адсутнасці неабходнага міжнароднага супрацоўніцтва, пра што, дарэчы, заяўляецца ў самім дакладзе".

"Адказы на ключавыя пытанні, накіраваныя ў адрас іншых уключаных краін у мэтах правядзення аб'ектыўнага і ўсебаковага расследавання, намі так і не былі атрыманы. Дадатковая інфармацыя ад беларускага боку зусім не запытвалася. Даклад мае шмат памылак, недакладнасцей, неавіяцыйных і неаб'ектыўных падыходаў, - падкрэсліў Валянцін Рыбакоў. - Выкарыстанне ў дакладзе інфармацыі ад ананімнай крыніцы пры адсутнасці належнай тэхнічнай экспертызы з'яўляецца недапушчальным. У сваю чаргу пісьмовыя паказанні сапраўднага авіядыспетчара, перададзеныя належным чынам беларускім бокам у адрас ІКАО, не былі ўлічаны".

Беларускі бок заявіў, што змест прадастаўленага ўладамі ЗША ў адрас рабочай групы нібыта аўдыязапісу, зробленага нібыта авіядыспетчарам, з'яўляецца падманам і падробкай.

Пастаянны прадстаўнік Рэспублікі Беларусь таксама адзначыў: "Цяпер самае важнае. Сама рабочая група прызнае, што ў паветранай прасторы Беларусі не было ні суправаджэння, ні перахопу, ні прымушэння да пасадкі самалёта авіякампаніі Ryanair якім-небудзь ваенным паветраным суднам, што сведчыць аб тым, што камандзір замежнага паветранага судна асабіста і самастойна прыняў рашэнне аб выкананні пасадкі ў аэрапорце горада Мінска. Усе гэтыя бясспрэчныя факты, дарэчы, прызнаныя рабочай групай, ніколькі не перашкодзілі заходнім дзяржавам тут жа абвінаваціць Беларусь у прымусовай пасадцы самалёта".

Валянцін Рыбакоў таксама звярнуў увагу: "Тут сёння прагучалі словы "паветраны тэрарызм". Практычна адразу ж былі ўведзены санкцыі не толькі супраць беларускага нацыянальнага авіяперавозчыка авіякампаніі "Белавія", але і супраць сваіх нацыянальных перавозчыкаў, якім забаранілі выкарыстоўваць беларускую паветраную прастору. Я хачу вам нагадаць, што авіякампанія "Белавія", дарэчы, была ледзь не адзінай, якая перавозіла і ратавала грамадзян вашых краін па вашай просьбе ў час пандэміі і татальных лакдаўнаў, за што атрымлівала потым шматлікія падзякі ад грамадзян і прадстаўнікоў вашых дзяржаў".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі