2 сакавіка, Мінск /Кар. БЕЛТА/. У Міністэрстве працы і сацыяльнай абароны прайшоў Нацыянальны савет па гендарнай палітыцы пры ўрадзе. Аб гэтым БЕЛТА паведамілі ў прэс-службе Мінпрацы.
Удзельнікамі пасяджэння сталі дэпутаты Нацыянальнага сходу Рэспублікі Беларусь, прадстаўнікі Канстытуцыйнага і Вярхоўнага суда, Міністэрства аховы здароўя, знешнепалітычнага міністэрства, Міністэрства эканомікі, Мінінфарма, Міністэрства юстыцыі, МУС, аблвыканкамаў, Мінскага гарвыканкама, Нацыянальнага цэнтра заканадаўства і прававых даследаванняў, грамадскіх арганізацый.
У час пасяджэння быў зацверджаны праект дзявятага перыядычнага даклада Рэспублікі Беларусь аб выкананні Канвенцыі аб ліквідацыі ўсіх форм дыскрымінацыі ў адносінах да жанчын. Праект даклада змяшчае звесткі аб заканадаўчых, арганізацыйна-адміністрацыйных і іншых мерах, прынятых у Беларусі для рэалізацыі палажэнняў Канвенцыі з 2016 па 2022 год.
"Наша краіна прадаўжае прымаць рэальныя меры па забеспячэнні роўных правоў і магчымасцей мужчын і жанчын ва ўсіх сферах працоўнага, грамадскага і асабістага жыцця, а таксама па паляпшэнні падыходаў да збору і аналізу даных, якія датычацца пытанняў гендарнай роўнасці", - сказала міністр працы і сацыяльнай абароны Ірына Касцевіч. Кіраўнік міністэрства звярнула ўвагу, што гэта пазіцыя застаецца актуальнай нягледзячы на беспрэцэдэнтны санкцыйны націск у адносінах да Беларусі.
Было таксама адзначана, што рэспубліка робіць канкрэтныя захады ў сферы забеспячэння гендарнага парытэту ў розных сферах жыццядзейнасці грамадства. На пасяджэнні было падкрэслена, што роўныя магчымасці для мужчын і жанчын у розных сферах гарантаваны асноўным законам Беларусі - Канстытуцыяй.
У час пасяджэння было таксама адзначана, што сістэмная работа ў гендарнай палітыцы дае вынік, сведчаннем чаму з'яўляюцца міжнародныя рэйтынгі. У прэс-службе ўдакладнілі, што згодна з Дакладам аб чалавечым развіцці 2021/2022 Беларусь па індэксе чалавечага развіцця знаходзіцца на 60-м месцы сярод 191 дзяржавы і ўваходзіць у групу краін з высокім узроўнем развіцця. Па версіі Сусветнага эканамічнага форуму ў рэйтынгу індэкса гендарнага разрыву Беларусь на 36-й пазіцыі сярод 146 краін (Даклад аб глабальным гендарным разрыве - 2022). Пры гэтым па крытэрыі "Эканамічны ўдзел і магчымасці" Беларусь заняла 4-е месца са 146 краін.-0-
