5 сакавіка, Мінск /Уладзімір Мацвееў - БЕЛТА/. Пасол Расіі ў Беларусі Дзмітрый Мезенцаў падкрэслівае важнасць развіцця і ўмацавання міжрэгіянальных сувязей. Аб гэтым ён заявіў карэспандэнту БЕЛТА напярэдадні візіту ў Мінск дэлегацыі Савета Федэрацыі Федэральнага сходу Расіі на чале са спікерам палаты Валянцінай Мацвіенка.
Пасол акцэнтаваў увагу, што менавіта ў фармаце міжрэгіянальнага супрацоўніцтва атрымліваюць развіццё сувязі на ўзроўні прадпрыемстваў, прадстаўнікоў бізнесу, сельгасвытворцаў, у сферах гандлю, гуманітарнай дзейнасці, адукацыі, аховы здароўя і па многіх іншых напрамках. "Гэта рэсурс, які па-свойму невычэрпны. Ён дапаўняе фармат міждзяржаўных двухбаковых адносін, шмат у чым рэгулюе і робіць іх багацейшымі", - лічыць Дзмітрый Мезенцаў.
Ён выказаў упэўненасць у тым, што тыя ці іншыя спрэчкі на ўзроўні суб'ектаў гаспадарання, пытанні гэта паставак нафты або яшчэ чаго-небудзь, не могуць і не павінны азмрочваць сістэму асаблівых адносін, якія існуюць паміж Беларуссю і Расіяй.
Плануецца, што 5 сакавіка з Валянцінай Мацвіенка сустрэнецца старшыня Савета Рэспублікі Наталля Качанава. Перагаворы пройдуць у вузкім і пашыраным фарматах. У гэты ж дзень спікеры верхніх палат парламентаў прымуць удзел у пасяджэнні аргкамітэта па падрыхтоўцы і правядзенні VII Форуму рэгіёнаў Беларусі і Расіі. Акрамя таго, запланавана сустрэча Валянціны Мацвіенка са старшынёй Палаты прадстаўнікоў Уладзімірам Андрэйчанкам.
"Практыка міжпарламенцкіх сувязей Расіі і Беларусі, імкненне да іх паглыблення, абмеркаванне канкрэтных пытанняў удасканалення нацыянальных заканадаўстваў, абмен вопытам і думкамі, шчырая, адкрытая размова - гэта тое, што заўсёды вызначае сустрэчы парламентарыяў, і на гэты раз будзе вызначаць візіт Валянціны Мацвіенка, якая па-асабліваму ставіцца да Беларусі", - падкрэсліў Дзмітрый Мезенцаў.
Дыпламат упэўнены, што візіт дэлегацыі Савета Федэрацыі і абмеркаванне маючага адбыцца форуму стане важным этапам паглыблення супрацоўніцтва суб'ектаў Расійскай Федэрацыі і рэгіёнаў Беларусі. "У мінулым годзе ў Санкт-Пецярбургу VI Форум рэгіёнаў паказаў значнасць і запатрабаванасць міжрэгіянальнага супрацоўніцтва. Былі падпісаны пагадненні на агульную суму $550 млн. Гэта значны рубеж", - адзначыў пасол.
Паводле яго слоў, у Мінску на пасяджэнні аргкамітэта, у прыватнасці, плануецца вызначыць структуру форуму, парадак дня, тэматыку і склад удзельнікаў. Дыпламат таксама падкрэсліў нязменную ўвагу прэзідэнтаў Расіі і Беларусі да мерапрыемстваў міжрэгіянальных форумаў.
Пасол таксама адзначыў рэгулярнасць візітаў у Беларусь кіраўнікоў розных расійскіх рэгіёнаў, сустрэчы з кіраўніком беларускай дзяржавы. "Гэта тое, што важна цаніць, удзяляць гэтаму ўвагу", - падкрэсліў дыпламат.
У Мінску Валянціна Мацвіенка ўскладзе вянок да стэлы "Мінск - горад-герой", прыме ўдзел у цырымоніі перадачы зямлі ў капсуле з месцаў пахавання савецкіх салдат пад Ржэвам храма-помніка ў гонар Усіх Святых у час міжнароднай акцыі памяці "На славу агульнай Перамогі!".
Пасол звярнуў увагу на адзінства падыходаў, якое кіраўніцтва Расіі і Беларусі нязменна паказвае свету ў ацэнцы маштабу беспрэцэдэнтнага подзвігу савецкага народа ў гады Вялікай Айчыннай вайны, асабліва на фоне частых спроб сказіць гісторыю. "Мы ўсё гэта па-асабліваму цэнім. Гэта важна перш за ўсё для маладога пакалення расіян і беларусаў", - сказаў Дзмітрый Мезенцаў.
Чакаецца, што 6 сакавіка Валянціна Мацвіенка і Наталля Качанава наведаюць мемарыяльны комплекс "Брэсцкая крэпасць - герой", дзе адбудзецца сустрэча з ветэранамі Вялікай Айчыннай вайны. "Паездка на легендарны рубеж пройдзе незадоўга да дня Вялікай Перамогі. Сустрэча з ветэранамі - гэта магчымасць яшчэ раз адчуць маштаб подзвігу", - падкрэсліў пасол.
Як паведамлялася, восенню ў Мінску і Мінскай вобласці пройдуць мерапрыемствы VII Форуму рэгіёнаў Беларусі і Расіі. Галоўнай тэмай форуму стане гістарычная спадчына Вялікай Перамогі як аснова развіцця сацыяльна-эканамічных і духоўных сувязей народаў Беларусі і Расіі.-0-