30 сакавіка, Мінск /Кар. БЕЛТА/. Рашэнні аб пераразмеркаванні паўнамоцтваў будуць прымацца не комплексна, адзіным дакументам, а кропкава, асобнымі нарматыўнымі прававымі актамі. Аб гэтым паведаміў журналістам прэм'ер-міністр Раман Галоўчанка па выніках нарады ў кіраўніка дзяржавы па пытаннях пераразмеркавання паўнамоцтваў паміж органамі дзяржаўнай улады, перадае карэспандэнт БЕЛТА.
"Будзем рухацца эвалюцыйным шляхам", - сказаў кіраўнік урада наконт пераразмеркавання паўнамоцтваў. Паводле яго слоў, папраўкі, якія абмяркоўваліся сёння на ўзроўні кіраўніка дзяржавы, закранаюць вялікую колькасць нарматыўных прававых актаў: законаў, указаў, пастаноў урада і г.д. Таму будуць прымацца асобныя дакументы.
На нарадзе таксама вызначаны канкрэтныя сферы, у якіх мэтазгодна змяніць узровень прыняцця рашэнняў. "Гэта і пытанні кадравай палітыкі, архітэктурнай і горадабудаўнічай дзейнасці, пытанні распараджэння дзяржмаёмасцю", - растлумачыў прэм'ер-міністр. У прыватнасці, плануецца даць органам улады на месцах паўнамоцтвы па зацвярджэнні генеральных планаў і планаў дэталёвай планіроўкі населеных пунктаў, унясення ў іх змяненняў.
"Дзяржава сталее, як і любы жывы арганізм, адпаведна ўзнікае неабходнасць у перыядычным пераглядзе тых ці іншых метадаў, форм рэалізацыі дзяржаўнага кіравання", - растлумачыў прэм'ер-міністр своечасовасць прыняцця рашэнняў аб пераразмеркаванні паўнамоцтваў.-0-