23 лютага, Мінск /Кар. БЕЛТА/. Беларуская дэлегацыя прымае ўдзел у пасяджэнні ПА АБСЕ ў Вене. Аб гэтым БЕЛТА паведамілі ў прэс-службе верхняй палаты парламента.
"Пасяджэнне ПА АБСЕ праходзіць у напружанай абстаноўцы, абумоўленай сур'ёзным расійска-ўкраінскім крызісам. Выступленні дакладчыкаў і нацыянальных парламенцкіх дэлегацый краін Захаду маюць аднабаковы антырасійскі характар. Парламентарыі гэтых краін не робяць захадаў па ўстанаўленні аб'ектыўнага прафесійнага дыялогу па пытанні сітуацыі ва Украіне", - заявіў старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Рачкоў.
Паводле яго слоў, парушаецца працэдура правядзення пасяджэння, "што паказвае негатоўнасць краін Захаду ўсебакова разглядаць заяўленыя пытанні парадку дня. Такія падыходы вядуць да паглыблення крызісу ў АБСЕ і яе парламенцкім вымярэнні".
"Беларуская дэлегацыя ўдзельнічае ва ўсіх мерапрыемствах пасяджэння ПА АБСЕ ў Вене", - дапоўніў Сяргей Рачкоў.
Беларускую парламенцкую дэлегацыю на пасяджэнні ПА АБСЕ ўзначальвае старшыня Пастаяннай камісіі па міжнародных справах Палаты прадстаўнікоў Андрэй Савіных. Сёння беларуская дэлегацыя прымае ўдзел у мерапрыемствах першага дня 22-га зімовага пасяджэння асамблеі: сумесным пасяджэнні трох агульных камітэтаў, а таксама пасяджэннях Агульнага камітэта па палітычных пытаннях і бяспецы, па эканамічных пытаннях, навуцы, тэхналогіі і навакольным асяроддзі і па дэмакратыі, правах чалавека і гуманітарных пытаннях.
Як удакладнілі ў прэс-службе Палаты прадстаўнікоў, нягледзячы на правакацыі ўкраінскай дэлегацыі, Андрэю Савіных удалося выступіць на пасяджэнні Агульнага камітэта па палітычных пытаннях і бяспецы.-0-
