29 чэрвеня, Мінск /Кар. БЕЛТА/. Пытанні гібрыднага ўздзеяння на Беларусь і Расію, умяшання ва ўнутраныя справы суверэнных дзяржаў, меры процідзеяння санкцыйнай палітыцы краін Захаду разгледжаны сёння ў Мінску ў час сустрэч па лініі апаратаў саветаў бяспекі дзвюх краін, перадае карэспандэнт БЕЛТА.
У прыватнасці, адбылася сустрэча дзяржаўнага сакратара Савета бяспекі Беларусі Аляксандра Вальфовіча з сакратаром Савета бяспекі Расійскай Федэрацыі Мікалаем Патрушавым. Акрамя таго, пад кіраўніцтвам іх намеснікаў Уладзіміра Арчакова і Рашыда Нургаліева праведзены кансультацыі па лініі апаратаў саветаў бяспекі дзвюх краін.
Такія мерапрыемствы праходзяць штогод, ахопліваюць максімальна шырокі ваенна-палітычны парадак дня і нацэлены на ўсебаковае ўмацаванне стратэгічнага партнёрства Беларусі і Расіі. На гэты раз бакі абмяняліся думкамі па актуальных праблемах міжнароднай бяспекі ва ўмовах дэградацыі існуючай сістэмы кантролю над узбраеннямі, падыходах да ажыццяўлення бяспекі ў розных сферах.
У двухбаковым парадку дня разгледжаны элементы падрыхтоўкі да сумесных стратэгічных вучэнняў узброеных сіл дзвюх краін "Захад-2021", ваенна-тэхнічнага супрацоўніцтва і аблягчэння кантрольных мер на ўнутранай граніцы Саюзнай дзяржавы.
Як расказаў журналістам па выніках мерапрыемстваў дзяржсакратар Савета бяспекі Беларусі Аляксандр Вальфовіч, бакі пацвердзілі прыхільнасць да далейшага паглыблення ўзаемадзеяння і супрацоўніцтва па розных напрамках нацыянальнай бяспекі і агульных падыходах да вырашэння праблемных пытанняў міжнароднай і рэгіянальнай бяспекі.-0-
