28 ліпеня, Мінск /Кар. БЕЛТА/. Экспертная група дзяржаў - удзельніц Садружнасці Незалежных Дзяржаў узгадніла праект плана шматузроўневых кансультацый паміж міністэрствамі замежных спраў у рамках СНД на 2022 год. Дакумент вырашана ўнесці ва ўстаноўленым парадку на разгляд Савета міністраў замежных спраў Садружнасці. Аб гэтым БЕЛТА паведамілі ў прэс-службе Выканаўчага камітэта СНД.
У пасяджэнні экспертнай групы, якое прайшло сёння з выкарыстаннем відэа-канферэнц-сувязі, прынялі ўдзел прадстаўнікі Азербайджана, Арменіі, Беларусі, Казахстана, Кыргызстана, Расіі, Таджыкістана, Узбекістана і Выканаўчага камітэта СНД.
У праект плана традыцыйна ўключаны тэмы, якія датычацца каардынацыі пазіцый дзяржаў Садружнасці ў ААН, узаемадзеяння з іншымі міжнароднымі арганізацыямі. Прадугледжваецца правядзенне кансультацый наконт процідзеяння новым выклікам і пагрозам, гарантавання міжнароднай інфармацыйнай бяспекі, кантролю над узбраеннямі і раззбраенчай тэматыкі, узаемадзеяння ў інфармацыйнай сферы, знешнепалітычнага планавання і іншых.
У фармаце кансультацый паміж міністэрствамі замежных спраў плануецца правядзенне пасяджэнняў Кансультатыўнага савета кіраўнікоў консульскіх службаў міністэрстваў замежных спраў, Кансультатыўнага камітэта кіраўнікоў прававых службаў міністэрстваў замежных спраў дзяржаў Садружнасці і сумеснай кансультатыўнай камісіі па пытаннях раззбраення.-0-
