10 снежня, Мінск /Кар. БЕЛТА/. Чакаецца, што пытанне аб назначэнні новага генеральнага сакратара Арганізацыі Дагавора аб калектыўнай бяспецы павінна быць вырашана да канца года. Аб гэтым у інтэрв'ю тэлеканалу "Беларусь 1" заявіла прэс-сакратар Прэзідэнта Беларусі Наталля Эйсмант, паведамляе БЕЛТА.
"Абмеркаванне гэтага пытання было не бурным, а вельмі бурным. Тут напружанне было такое, што прасіць прабачэння ў фінале давялося ўсім перад усімі", - адзначыла прэс-сакратар.
"Як заявіў наш Прэзідэнт, гэта пытанне ўжо вырашана. І вырашана яно вось у якім ключы: усё будзе абсалютна ў рамках статута арганізацыі. На сённяшні дзень вызначана, што рашэнне аб назначэнні новага генеральнага сакратара АДКБ кіраўнікамі дзяржаў-удзельніц будзе падпісана ў рабочым парадку. Механізм будзе выглядаць так: кандыдат на пасаду (гэта прадстаўнік Беларусі) аб'едзе ў бліжэйшы час усе краіны-ўдзельніцы, пазнаёміцца з лідарамі краін, пройдзе своеасаблівую гутарку. Пасля гэтага пры пазітыўным развіцці падзей кіраўнік краіны-ўдзельніцы падпіша рашэнне аб яго назначэнні", - расказала прэс-сакратар.
"Што датычыцца кворуму - наколькі я ведаю, аб гэтым гаварыў Прэзідэнт Казахстана - калі якая-небудзь краіна - удзельніца АДКБ не падпісваецца пад нейкім рашэннем, то яна мае права яго не выконваць. Што вызначана кіраўнікамі дзяржаў адназначна і падтрымана ўсімі, у тым ліку Прэзідэнтам Расіі, - гэта тое, што пытанне павінна быць вырашана да новага года. А механізм вырашэння, аб якім я расказала вышэй, прапанаваў ужо наш прэзідэнт. І ён таксама быў падтрыманы", - рэзюмавала Наталля Эйсмант.-0-
