11 сакавіка, Масква /Эдуард Півавар - БЕЛТА/. Прэзідэнт Расіі Уладзімір Пуцін і генеральны сакратар АДКБ Станіслаў Зась правялі сёння сустрэчу ў загараднай рэзідэнцыі кіраўніка расійскай дзяржавы ў Нова-Агарове. Інфармацыю аб гэтым распаўсюдзіла прэс-служба Крамля, паведамляе БЕЛТА.
"Абмяркоўвалася рэалізацыя планаў па барацьбе з тэрарызмам, наркагандлем, а таксама забеспячэнне бяспекі на святочных мерапрыемствах, прысвечаных 75-годдзю Вялікай Перамогі", - гаворыцца ў паведамленні.
З 1 студзеня пасаду генеральнага сакратара АДКБ займае прадстаўнік Беларусі Станіслаў Зась. Яго кандыдатура была зацверджана лідарамі краін - членаў арганізацыі 28 лістапада 2019 года. "Вельмі рады вас бачыць у гэтай новай якасці, - сказаў на сустрэчы Уладзімір Пуцін. - Вы чалавек вопытны. Спадзяюся, увесь свой вопыт выкарыстоўваеце на тое, каб сакратарыят АДКБ працаваў рытмічна, каб усе планы, якія былі выбудаваны яшчэ ў папярэдні час, рэалізоўваліся. Маю на ўвазе і зладжванне нашых калектыўных сіл, і работу па важнейшых напрамках - барацьбу з тэрарызмам, наркапагрозы і гэтак далей. У нас шмат планаў. Наперадзе - святочныя мерапрыемствы, прысвечаныя 75-годдзю Перамогі ў Вялікай Айчыннай вайне. І ў рамках АДКБ таксама намечаны пэўныя мерапрыемствы. Вельмі разлічваю на тое, што ўсё гэта будзе выконвацца".
Уладзімір Пуцін нагадаў, што старшынства ў гэтым годзе ў АДКБ перайшло да Расіі. "Таму будзем працаваць з вамі больш цесна, чым у звычайным, радавым рэжыме", - адзначыў ён.
Станіслаў Зась сказаў, што на новай пасадзе знаходзіцца два з паловай месяцы. "Ёсць дакладнае разуменне, што трэба рабіць", - запэўніў генеральны сакратар АДКБ. Затым ён расказаў аб задачах, якія стаяць перад АДКБ на парадку дня ў гэтым годзе.-0-
