22 студзеня, Масква /Эдуард Півавар - БЕЛТА/. Пункты прыёму расійскага адзінага дзяржаўнага экзамену ў Беларусі і беларускага цэнтралізаванага тэсціравання ў Расіі могуць быць створаны ўжо ў бліжэйшую ўступную кампанію ў ВНУ дзвюх краін. Такую магчымасць не выключыў дзяржаўны сакратар Саюзнай дзяржавы Рыгор Рапота, адказваючы на пытанні журналістаў па выніках праведзенага 21 студзеня пасяджэння Групы высокага ўзроўню Савета Міністраў Саюзнай дзяржавы, перадае карэспандэнт БЕЛТА.
"Я лічу, што гэта цалкам можа быць рэальным, - сказаў Рыгор Рапота. - У лютым сустрэнуцца міністры адукацыі, яны гэта пытанне абмяркуюць і вырашаць. Гатоўнасць да разгляду гэтага пытання існуе, тут я не бачу вялікіх праблем".
Дзяржсакратар нагадаў, што тэма адкрыцця пунктаў прыёму расійскага адзінага дзяржаўнага экзамену ў Беларусі і беларускага цэнтралізаванага тэсціравання ў Расіі ўжо абмяркоўвалася на сумеснай калегіі міністэрстваў адукацыі дзвюх краін. "Яна тэхналагічна не складаная, таму што і Расія, і Беларусь прадастаўляюць такія магчымасці здаваць экзамены: ЦТ для тых, хто паступае ў беларускія ВНУ, і АДЭ для тых, хто паступае ў расійскія, - адзначыў ён. - Проста раней гэтыя экзамены прымалі кожны на сваім баку, гэта значыць, расіяне прыязджалі ў Беларусь, а беларусы - у РФ. Але цяпер эпідэміялагічная сітуацыя такая, што перасячэнне граніцы мае пэўныя складанасці".
Пасяджэнне правялі сустаршыні ГВУ пасол Беларусі ў Расіі, надзелены паўнамоцтвамі намесніка прэм'ер-міністра, Уладзімір Сямашка і віцэ-прэм'ер Расіі Аляксей Авярчук. У мерапрыемстве таксама прынялі ўдзел дзяржсакратар Саюзнай дзяржавы Рыгор Рапота, пасол Расіі ў Беларусі Дзмітрый Мезенцаў, адказны сакратар Парламенцкага сходу Саюза Беларусі і Расіі Сяргей Стрэльчанка, кіраўнікі галіновых беларускіх і расійскіх міністэрстваў, прадстаўнікі Пастаяннага камітэта Саюзнай дзяржавы.-0-
