27 красавіка, Масква /Эдуард Півавар - БЕЛТА/. Пасяджэнне Еўразійскага міжурадавага савета пройдзе 29-30 красавіка ў Казані (Расія). Інфармацыю аб гэтым размясціла на сваёй старонцы ў Facebook памочнік старшыні Калегіі Еўразійскай эканамічнай камісіі Ія Малкіна, паведамляе БЕЛТА.
Ія Малкіна адзначыла: па традыцыі на пасяджэнне запрошаны таксама кіраўнікі ўрадаў дзяржаў - наглядальнікаў пры Еўразійскім эканамічным саюзе: Кубы, Малдовы і Узбекістана.
"Пра парадак дня. Міжурадавы савет разгледзіць вынікі пілотнага праекта ў галіне знешняга электроннага гандлю, а таксама магчымасць зніжэння парогаў бяспошліннага ўвозу тавараў для асабістага карыстання", - паведаміла памочнік старшыні Калегіі ЕЭК. Акрамя таго, плануецца абмеркаваць пытанне ўніфікацыі мер рэгулявання экспарту асобных відаў тавараў, меры па абароне рынку сельгаспрадукцыі ЕАЭС ад небяспечных вірусаў раслін, а таксама перспектывы супрацоўніцтва краін саюза ў сферы касмічных паслуг.
"Таксама ў парадку дня - пытанне адмены рашэння Калегіі ЕЭК аб выкананні Рэспублікай Беларусь абавязацельстваў па функцыянаванні ўнутранага рынку саюза. Размова ідзе пра рашэнне, якім прызнана бар'ерам патрабаванне аб абавязковым асартыменце беларускіх тавараў на паліцах у магазінах рознічнага гандлю краіны", - дадала Ія Малкіна.-0-
