21 студзеня, Мінск /Кар. БЕЛТА/. Прапрацоўваюцца візіты ў Беларусь парламенцкіх дэлегацый Швейцарыі і Малдовы, паведаміў сёння журналістам старшыня Пастаяннай камісіі па міжнародных справах Палаты прадстаўнікоў Андрэй Савіных, паведамляе карэспандэнт БЕЛТА.
Сёння ў Палаце прадстаўнікоў прайшло пасяджэнне Пастаяннай камісіі па міжнародных справах. У прыватнасці, разгледжаны праект плана міжнароднага парламенцкага супрацоўніцтва Палаты прадстаўнікоў на 2021 год. Як адзначыў Андрэй Савіных, канчаткова план будзе адобраны на Савеце Палаты прадстаўнікоў.
"Хачу падкрэсліць перш за ўсё актывізацыю міжнародных кантактаў па лініі міжпарламенцкіх арганізацый, у тым ліку Саюзнай дзяржавы, СНД, Цэнтральнай еўрапейскай ініцыятывы і шэрага іншых. Я думаю, гэта адлюстроўвае надзею на актывізацыю кантактаў і на тое, што міжнародная супольнасць зможа ўзяць пад кантроль распаўсюджванне каранавіруса, - сказаў старшыня камісіі. - План таксама прадугледжвае кантакты па лініі двухбаковых сувязей. Плануюцца афіцыйныя парламенцкія дэлегацыі Беларусі ў Егіпет, Сербію, магчыма, Венгрыю. Акрамя таго, мы прапрацоўваем візіты замежных парламентарыяў да нас па лініі Швейцарыі і Малдовы. Мы плануем мерапрыемствы па лініі груп дружбы па сувязях з парламентамі Ірана, Турцыі, Швейцарыі, Венгрыі, Аўстрыі і шэрага іншых краін".
Сёння падчас пасяджэння профільнай камісіі таксама разгледжаны план падрыхтоўкі законапраектаў на 2021 год, зацверджаны ўказам Прэзідэнта ад 4 студзеня 2021 года нумар 2. "Па лініі камісіі ў першым паўгоддзі плануецца разгледзець два законапраекты: аб знешняй міграцыі і аб дыпламатычнай службе. Я думаю, што ўсе дэпутаты камісіі будуць прымаць самы актыўны ўдзел у распрацоўцы гэтых законапраектаў", - падкрэсліў Андрэй Савіных.-0-
