17 лютага, Мінск /Кар. БЕЛТА/. Стварэнне медыяхолдынга Саюзнай дзяржавы - адно з важнейшых пытанняў супрацоўніцтва Беларусі і Расіі ў сацыяльна-гуманітарнай сферы, заявіў намеснік прэм'ер-міністра Ігар Петрышэнка ў час сустрэчы з дзяржаўным сакратаром Саюзнай дзяржавы Дзмітрыем Мезенцавым, паведамляе карэспандэнт БЕЛТА.
Ігар Петрышэнка і Дзмітрый Мезенцаў абмеркавалі ўзаемадзеянне ў сферы культуры, адукацыі і спорту. "Беларуска-расійскае ўзаемадзеянне ў сацыяльна-гуманітарнай сферы актыўна развіваецца. Мы бачым, што штогод супрацоўніцтва Саюзнай дзяржавы напаўняецца рознымі культурнымі праектамі, якія камфортныя і для беларусаў, і для расіян. Думаю, нам трэба прадаўжаць гэты напрамак, каб культурны складнік нашага супрацоўніцтва быў у авангардзе ўсіх інтэграцыйных працэсаў, - адзначыў Ігар Петрышэнка. - Важна таксама абмеркаваць пытанні ў сферы адукацыі і маладзёжнае ўзаемадзеянне. Моладзь павінна быць прасякнута ідэяй інтэграцыйнага супрацоўніцтва і далей развіваць яго. У нас ужо ёсць шэраг канкрэтных прапаноў". На фоне ўсіх цяжкасцей прадаўжаецца і супрацоўніцтва ў спартыўнай сферы.
Паводле слоў віцэ-прэм'ера, ключавое пытанне сустрэчы і супрацоўніцтва дзвюх краін - стварэнне медыяхолдынга Саюзнай дзяржавы. "Мы зацікаўлены. Напрацаваны адпаведныя канцэптуальныя прапановы. Як сказаў Прэзідэнт Беларусі, мы зможам стварыць магутны, сучасны і эфектыўны медыяхолдынг, які будзе паказваць беларусам і расіянам усё, што робіцца ў рамках Саюзнай дзяржавы", - рэзюмаваў Ігар Петрышэнка.-0-
