8 чэрвеня, Мінск /Кар. БЕЛТА/. Дамінаванне Злучаных Штатаў Амерыкі выключана, свет будзе шматпалярным. Аб гэтым заявіў журналістам сакратар Савета бяспекі Расіі Мікалай Патрушаў, перадае карэспандэнт БЕЛТА.
"Штаты зацікаўлены, каб не было шматпалярнага свету. А вельмі сур'ёзны полюс шматпалярнага свету - Кітай. Таму Расія не канчатковая мэта. Яны хочуць Расію знішчыць або аслабіць. Іх канчатковая мэта - Кітай. Тады яны будуць дамінаваць у свеце. Але гэта выключана, у іх не атрымаецца", - заявіў Мікалай Патрушаў.
Ён звярнуў увагу, што ў канфлікце на тэрыторыі Украіны не зацікаўлены ні народ самой Украіны, ні народ Расіі, ні народы іншых краін АДКБ, але чамусьці ён пачаўся і прадаўжае разгортвацца.
"Называю вам краіны, якія ў першую чаргу зацікаўлены, - гэта ЗША і Англія. Тут трэба дакладна разумець, што ім не шкада тых людзей, якія гінуць, таму што гэта не іх людзі і таму што яны вядуць ваенныя дзеянні не на іх тэрыторыі", - сказаў сакратар Савета бяспекі Расіі.
Паводле яго слоў, кіраўніцтва Украіны было гатова да заключэння мірнага дагавора з Расіяй і нават прадставіла свае прапановы, але з-за націску Злучаных Штатаў вымушана было адмовіцца ад гэтага. "Таму зацікаўленыя ў гэтым канфлікце ёсць", - падкрэсліў Мікалай Патрушаў.-0-
