13 студзеня, Мінск /Кар. БЕЛТА/. Дасягнуць належнага ўзроўню бяспекі і ўзаемадзеяння можна толькі праз дыялог. Упэўненасць у гэтым выказаў пастаянны прадстаўнік Беларусі пры АБСЕ Андрэй Дапкюнас, выступаючы 13 студзеня на пасяджэнні Пастаяннага савета АБСЕ ў Вене, паведамляе карэспандэнт БЕЛТА.
У час мерапрыемства Польшча, якая на працягу 2022 года будзе старшынстваваць у АБСЕ, прадставіла прыярытэты дзейнасці арганізацыі на гэты перыяд.
У сувязі з гэтым Андрэй Дапкюнас падкрэсліў: "Дэлегацыя Беларусі вітае міністра замежных спраў Польшчы на пасяджэнні Пастаяннага савета і дзякуе яму за прадстаўленне прыярытэтаў дзеючага старшынства АБСЕ і бачання шляхоў развіцця нашай арганізацыі. Удзячны вам за заяўленую адкрытасць пры далейшым абмеркаванні шляхоў забеспячэння ўсёабдымнай і непадзельнай бяспекі".
"Менавіта ў кантэксце пабудовы на прасторы АБСЕ супольнасці ўсёабдымнай, заснаванай на супрацоўніцтве і непадзельнай бяспекі, як аб гэтым было заяўлена ў падагульняючай дэкларацыі апошняга саміту арганізацыі ў Астане ў 2010 годзе, мы ўспрымаем і агучаную сёння заяву дэлегацыі Расійскай Федэрацыі, і нядаўнія расійскія прапановы па выпрацоўцы гарантый бяспекі", - сказаў пастаянны прадстаўнік Беларусі.
Ён звярнуў увагу, што Беларусь заўсёды выступае за шырокі дыялог, накіраваны на пераадоленне супярэчнасцей і зніжэнне канфрантацыі.
У прыватнасці, Андрэй Дапкюнас падкрэсліў: "Мы па-ранейшаму перакананы, што толькі праз дыялог зможам дасягнуць належнага ўзроўню бяспекі і ўзаемадзеяння. Нам імпануе акцэнт, які дзеючае старшынства мае намер зрабіць на паляпшэнні якасці нашай дыскусіі. Гэта непасрэдна звязана з павышэннем рэзультатыўнасці нашага ўзаемадзеяння".
Беларускі прадстаўнік выказаў меркаванне, што менавіта недастатковая рэзультатыўнасць - найбольш слабое месца ў нашай агульнай рабоце. Ён упэўнены ў тым, што станоўчыя зрухі ў гэтым пытанні магчымы ў тым выпадку, калі кожны ўдзельнік арганізацыі будзе спрабаваць не толькі выказаць, што набалела, а знойдзе ў сабе сілы сказаць гэта так, каб не адштурхнуць партнёра, а, наадварот, пабудаваць новыя масты даверу і разумення.
"Мы звярнулі ўвагу на тое, што адной з перадумоў поспеху АБСЕ паважаны старшыня назваў "дэманстрацыю сілы праз добрыя справы". Беларусі блізкі гэты падыход. Сапраўдная веліч сілы, у тым ліку ў сусветнай палітыцы, не заключаецца ў здольнасці разбураць. Сапраўдная сіла праяўляецца ў міласэрнасці і велікадушнасці", - сказаў Андрэй Дапкюнас.
У якасці прыкладу такой высакароднай праявы палітычнай сілы ён прывёў апублікаваную дзесяць дзён таму сумесную заяву лідараў пяці дзяржаў, якія валодаюць ядзернай зброяй, аб прадухіленні ядзернай вайны і недапушчэнні гонкі ўзбраенняў. "Чатыры з гэтых дзяржаў уваходзяць у нашу арганізацыю. Такія лёсавызначальныя дакументы не павінны губляцца ў патоку дзяжурных дэбатаў, - упэўнены пастаянны прадстаўнік Беларусі пры АБСЕ. - Іх унікальны гуманістычны зарад можна і трэба выкарыстоўваць для пераадолення варожасці і збліжэння ўсюды, уключаючы нашу арганізацыю".
На думку беларускага дыпламата, з улікам згубнай спадчыны COVID-19 бачыцца апраўданым фокус польскага старшынства на абмен перадавым вопытам аднаўлення і мадэрнізацыі эканомікі, у тым ліку шляхам зніжэння рызык, стымулявання прадпрымальніцтва, у цэлым развіцця чалавечага патэнцыялу.
"Пры гэтым лічым патрэбным заявіць аб нашым непрыманні санкцыйнага падыходу, які не адпавядае ні літары, ні духу хельсінкскага працэсу. У арганізацыі, унікальна пабудаванай на прынцыпе ўсеагульнай згоды, роля старшыні асабліва складаная і далікатная. Нехта можа са мной не згадзіцца, але, мне здаецца, ідэальны старшыня ў сваёй рабоце мала прыкметны. Важная нябачная работа старшыні выступае толькі ўскосна: у збліжэнні ўдзельнікаў арганізацыі, у большай добразычлівасці і стрыманасці дыскусіі, у дыялогу, у якім знаходзіцца месца эмпатыі", - падкрэсліў Андрэй Дапкюнас.
Беларускі дыпламат выказаў надзею, што польскаму старшынству ўдасца забяспечыць пераемнасць намаганняў папярэдніх старшынстваў і эфектыўна арганізаваць калектыўную работу ў АБСЕ ў духу непрадузятага і справядлівага пасрэдніцтва з роўнай увагай да інтарэсаў і прыярытэтаў усіх дзяржаў-удзельніц.
Беларусь будзе старшынстваваць у другім трыместры 2022 года ў Форуме АБСЕ па супрацоўніцтве ў галіне бяспекі (ФСЗБ). Як чакаецца, у чэрвені адбудзецца сумеснае пасяджэнне Пастаяннага савета АБСЕ і ФСЗБ.-0-
