22 лістапада, Мінск /Кар. БЕЛТА/. У Беларусі і Кубы ёсць аб'ектыўны патэнцыял для развіцця адносін, заявіў Надзвычайны і Паўнамоцны Пасол Кубы ў Беларусі Санцьяга Перэс Бенітэс у час сустрэчы са старшынёй Палаты прадстаўнікоў Уладзімірам Андрэйчанкам, перадае карэспандэнт БЕЛТА.
"Ёсць аб'ектыўны патэнцыял для развіцця нашых адносін. І па лініі экспарту Кубы сюды, і па лініі імпарту з Беларусі. Я заўсёды называю лічбу, што на Кубе ёсць каля 70 тыс. трактароў МТЗ, якія трэба абслугоўваць. Тут ёсць вялікі патэнцыял. Калі гаварыць аб грузавіках МАЗ - таксама вялікі патэнцыял", - адзначыў Санцьяга Перэс Бенітэс.
Паводле слоў пасла, ён часты госць у Палаце прадстаўнікоў. "Тут такая дружалюбная атмасфера ў адносінах да Кубы. Я нават сказаў бы, што гэта братэрскія сувязі. Сапраўды, узаемаразуменне ідзе па ўсіх напрамках. Пасля COVID-19 намеціўся ўздым нашых адносін і відаць зацікаўленасць з беларускага і кубінскага боку, - падкрэсліў ён. - Я паспеў пабываць у абласцях Беларусі, засталося толькі Гродна. У мяне склаліся цудоўныя адносіны з МЗС, Мінсельгасхарчам, Міністэрствам прамысловасці, а таксама па лініі прадпрымальніцкіх колаў".
Плануецца, што ў ходзе сустрэчы бакі абмяркуюць узаемадзеянне паміж заканадаўчымі органамі абедзвюх краін, у тым ліку па лініі груп дружбы, беларуска-кубінскае супрацоўніцтва ў гандлёва-эканамічнай і гуманітарнай галінах, а таксама маючы адбыцца візіт у Рэспубліку Беларусь старшыні Нацыянальнай асамблеі народнай улады Рэспублікі Куба Хуана Эстэбана Ласа Эрнандэса.-0-
