19 студзеня, Мінск /Кар. БЕЛТА/. Пасол Беларусі Андрэй Мяцеліца ўручыў даверчыя граматы прэзідэнту Пакістана Арыфу Алві, паведамілі БЕЛТА ў беларускай дыпмісіі.
У час асабістай сустрэчы пасля цырымоніі бакі абмеркавалі актывізацыю палітычнага дыялогу і гандлёва-эканамічнага супрацоўніцтва паміж краінамі. "Падкрэслена неабходнасць умацавання ўзаемадзеяння ў такіх важных для Беларусі і Пакістана галінах, як прамысловасць, сельская гаспадарка і фармацэўтыка. У пазітыўным рэчышчы адзначана, што, нягледзячы на звязаныя з пандэміяй абмежаванні, у 2020 годзе адбыліся сумесныя мерапрыемствы па навуцы, тэхналогіях, ахове здароўя і фармацэўтыцы", - расказалі ў пасольстве.
Андрэй Мяцеліца і Арыф Алві абмеркавалі запланаваныя на гэты год мерапрыемствы, у тым ліку пасяджэнне сумеснай камісіі па гандлёвым і эканамічным супрацоўніцтве, раўнд палітычных кансультацый на ўзроўні намеснікаў кіраўнікоў знешнепалітычных ведамстваў, сустрэчы экспертных рабочых груп у сферах прамысловасці і сельскай гаспадаркі.
Пасол пацвердзіў запрашэнні прэм'ер-міністру і спікеру Нацыянальнай асамблеі парламента Пакістана наведаць Беларусь. У сувязі з гэтым Арыф Алві згадзіўся, што сустрэчы на вышэйшым узроўні даюць штуршок развіццю супрацоўніцтва ва ўсіх сферах. Прэзідэнт таксама адзначыў, што прамысловая прадукцыя Беларусі, асабліва трактар "Беларус", здаўна вядома ў Пакістане.
"На заканчэнне сустрэчы прэзідэнт Пакістана выказаў гатоўнасць кіраўніцтва краіны і ў далейшым развіваць дружалюбныя адносіны з Беларуссю, пажадаў поспехаў новаму беларускаму паслу, а беларуска-пакістанскім адносінам - далейшага працвітання і росту", - дадалі ў дыпмісіі.-0-
