6 снежня, Мінск /Кар. БЕЛТА/. Беларусь і ААЭ ўстанавілі трывалае партнёрства ў розных галінах. Аб гэтым заявіў Надзвычайны і Паўнамоцны Пасол ААЭ ў Рэспубліцы Беларусь Ібрагім Салім Махамед Аль-Мушарах, паведамляе карэспандэнт БЕЛТА.
"У 2022 годзе споўнілася 30 гадоў з дня ўстанаўлення дыпламатычных адносін паміж Аб'яднанымі Арабскімі Эміратамі і Беларуссю. На працягу гэтага перыяду палітычныя адносіны паміж дзвюма краінамі імкліва развіваюцца праз абмен візітамі на высокім узроўні, што пацвярджае моцную дружбу паміж эмірацкім і беларускім народамі. Таксама гэтыя адносіны характарызуюцца ўзаемнай павагай і наяўнасцю агульных інтарэсаў дзякуючы цеснаму супрацоўніцтву паміж палітычным кіраўніцтвам краін, а таксама рэгулярным візітам на вышэйшым узроўні, абменам афіцыйнымі дэлегацыямі, удзелу ў выстаўках, семінарах і канферэнцыях", - сказаў Ібрагім Салім Махамед Аль-Мушарах.
Паводле яго слоў, Аб'яднаныя Арабскія Эміраты і Беларусь надаюць вялікае значэнне супрацоўніцтву ў такіх сферах, як гандаль, эканоміка, інвестыцыі, энергетыка, змяненне клімату, развіццё культуры, адукацыі, аховы здароўя і спорту. Краіны таксама ўдзяляюць увагу ўмацаванню консульскіх адносін, супрацоўніцтву ў міжнародных арганізацыях, барацьбе з тэрарызмам і гэтак далей. "Усё гэта з'яўляецца вынікам практычнай волі, якая дазволіла дзвюм краінам устанавіць трывалае партнёрства ў розных галінах", - падкрэсліў пасол.
"Як Беларусь з'яўляецца важнай для нашай дзяржавы краінай, так і Аб'яднаныя Арабскія Эміраты сталі адным з найбуйнейшых гандлёва-эканамічных партнёраў Беларусі ў рэгіёне. Пасольства будзе садзейнічаць развіццю палітычнага дыялогу, умацаванню адносін паміж дзвюма краінамі", - канстатаваў дыпламат.-0-
