17 мая, Масква /Эдуард Півавар - БЕЛТА/. Пасяджэнне Савета міністраў замежных спраў АДКБ адбудзецца 22 мая ў Бішкеку, паведаміў БЕЛТА прэс-сакратар АДКБ Уладзімір Зайнетдзінаў.
"Пасяджэнне пройдзе ў вузкім і пашыраным складзе. У першай частцы міністры абмяняюцца думкамі аб актуальных праблемах міжнароднай і рэгіянальнай бяспекі, абмяркуюць дзейнасць арганізацыі ў бягучых умовах", - адзначыў прэс-сакратар.
У пашыраным складзе плануецца разгледзець і падпісаць дакументы, якія закранаюць розныя сферы дзейнасці АДКБ. У іх ліку - пералік сумесных заяў у 2019 годзе. Чакаецца, што будуць адобраны праекты рашэнняў Савета калектыўнай бяспекі АДКБ "Аб плане калектыўных дзеянняў дзяржаў - членаў АДКБ па рэалізацыі глабальнай антытэрарыстычнай стратэгіі ААН на 2019-2021 гады", "Аб пераліку дадатковых мер, накіраваных на зніжэнне напружанасці ў таджыкска-афганскім прыграніччы", а таксама прыняты рашэнні СМЗС АДКБ "Аб плане кансультацый прадстаўнікоў дзяржаў - членаў АДКБ па пытаннях знешняй палітыкі, бяспекі і абароны на другое паўгоддзе 2019 года - першае паўгоддзе 2020 года" і "Аб рэгламенце інфармацыйнага ўзаемадзеяння Цэнтра крызіснага рэагавання АДКБ".
"Увогуле праект парадку дня СМЗС АДКБ змяшчае восем пытанняў, якія датычацца практычна ўсіх сфер дзейнасці арганізацыі", - дадаў прэс-сакратар.
Напярэдадні ў Мінску выконваючы абавязкі генеральнага сакратара АДКБ Валерый Семерыкоў паведаміў журналістам, што 22 мая на пасяджэнні Савета міністраў замежных спраў АДКБ будзе вырашацца пытанне аб назначэнні генеральнага сакратара арганізацыі. Паводле яго слоў, будзе абмяркоўвацца назначэнне на пасаду кіраўніка АДКБ прадстаўніка Беларусі, дзяржсакратара Савета бяспекі Станіслава Зася. Валерый Семерыкоў нагадаў, што да Рэспублікі Беларусь чарга займаць пасаду генеральнага сакратара пераходзіць 1 студзеня 2020 года. Сёння гэту пазіцыю павінен замяшчаць прадстаўнік Арменіі, але адбыўся форс-мажор. "Думаю, 22 мая будзе прынята канчатковае рашэнне па назначэнні. У нас адна кандыдатура ўнесена на ўзгадненне, і многія прэзідэнты яе адобрылі. Мы будзем гэта пытанне прадметна і канкрэтна абмяркоўваць", - адзначыў в.а. генсакратара АДКБ.
Як паведамлялася, дзяржаўны сакратар Савета бяспекі Беларусі Станіслаў Зась быў прапанаваны на пасаду генеральнага сакратара АДКБ. Беларускую кандыдатуру ўжо ўзгаднілі Кыргызстан, Казахстан, Таджыкістан і Расія. Захоўваюцца толькі складанасці ва ўзаемадзеянні па гэтым пытанні з Арменіяй, якая датэрмінова адклікала свайго прадстаўніка Юрыя Хачатурава з адпаведнай пасады, але зноў настойвала на назначэнні сваёй кандыдатуры.-0-
