28 мая, Мінск /Кар. БЕЛТА/. Беларусь, Расія, Кітай - фарпосты суверэннасці ў сучасным свеце. Такое меркаванне ў эфіры тэлеканала АНТ выказала прафесар Маскоўскага дзяржаўнага інстытута міжнародных адносін (МДІМА) Алена Панамарова, паведамляе БЕЛТА.
Эксперт адзначыла, што тэхналогія націску, якую цяпер Захад прымяняе ў адносінах да Беларусі, не новая. "Гэта тэхналогія ўжо не раз прымянялася заходняй супольнасцю, пачынаючы ад Балканскага крызісу і заканчваючы "Белымі каскамі" ў Сірыі (арганізацыя атрымала падтрымку на Захадзе, але абвінавачвалася сірыйскімі ўладамі ў сувязях з экстрэмістамі. - Заўвага БЕЛТА), - сказала Алена Панамарова. - Ва ўмовах глабалізацыі вырас такі монстр, як глыбінная дзяржава, якая ўяўляе сабой кангламерат транснацыянальнай кампаніі і наднацыянальных, ваенізаваных структур і нават міжнароднага крыміналу. І вельмі часта менавіта яны дыктуюць сваю волю дзяржавам. Я ўжо не кажу пра еўрапейскія краіны, якія цесна ўключаны ў парадак дня наднацыянальнай структуры, і яна вызначае іх палітыку. І ў беларускім кейсе гэта вельмі добра відаць".
Алена Панамарова растлумачыла: не самі дзяржавы канкрэтна прымалі рашэнні ў гэтай сітуацыі. "А іх фактычна прымусілі, абавязалі, вымусілі падпісацца пад меркаваннем нейкіх еўрачыноўнікаў. І ў гэтым сэнсе Расія, Беларусь, Кітай - гэта тыя фарпосты суверэннасці ў сучасным свеце, якія трэба ўсяляк развіваць, аберагаць і паказваць, што можна на самай справе жыць дастойна, сумленна і самастойна", - дадала яна.-0-
