ДЗЯРЖОРГАНЫДЗЯРЖОРГАНЫ
Аўторак, 19 студзеня 2021
Мінск Пераменная воблачнасць -20°C
Усе навіны
Усе навіны
Палітыка
26 лістапада 2020, 15:40

"Насмешка з разважлівасці" - Макей пракаменціраваў далучэнне Украіны да антыбеларускіх санкцый

26 лістапада, Мінск /Кар. БЕЛТА/. Далучэнне Украіны да заходніх санкцый у адносінах да Беларусі - чарговае несамастойнае рашэнне гэтай краіны. Аб гэтым заявіў сёння журналістам міністр замежных спраў Беларусі Уладзімір Макей па выніках пасяджэння ў Мінску калегій знешнепалітычных ведамстваў Беларусі і Расіі, перадае карэспандэнт БЕЛТА.

"Мы не можам расцэньваць гэты крок інакш як абсалютна недружалюбны крок і спробу адкрытага ўмяшання ва ўнутраныя справы Беларусі", - сказаў Уладзімір Макей.

Ён падкрэсліў, што далучэнне Украіны да заходніх санкцый у адносінах да Беларусі - гэта чарговае несамастойнае рашэнне суседняй краіны, якое дэманструе непаслядоўнасць яе палітыкі. "Калі гаварыць адкрыта, мы разглядаем гэта як насмешку з разважлівасці", - заявіў міністр.

Уладзімір Макей адзначыў, што міністр замежных спраў Літвы Лінас Лінкявічус нядаўна заявіў, што Еўропа ўжо стамілася ад Украіны. Таму гэта краіна спрабуе паказаць сябе эталонам дэмакратыі і захавання правоў чалавека, звярнуў увагу кіраўнік беларускага МЗС. "Украіна не з'яўляецца для нас эталонам па правах чалавека і, мы лічым, не можа ў гэтай сітуацыі выступаць ментарам або настаўнікам у адносінах да Беларусі. Калі яны гавораць, што клапоцяцца аб дабрабыце краіны або народа Беларусі, гэта тым больш выклікае здзіўленне. Яны заявілі, што паставілі ўсе адносіны на паўзу, што трэба аказваць націск, каб прыйшла ісціна ў іх разуменні дэмакратыі. Пры гэтым яны далучаюцца да санкцый супраць Беларусі. Гэта значыць яны дапамагаюць народу і краіне праз санкцыі, больш строгае ўзаемадзеянне. Гэта абсалютна перакручаная логіка, і мы катэгарычна не вітаем такі падыход", - падкрэсліў дыпламат.

Паводле слоў міністра, беларускі бок ужо выпрацаваў і гатовы прыняць меры ў адказ. "На першапачатковым этапе мы таксама падрыхтавалі санкцыйны спіс у адносінах да афіцыйных асоб Украіны. Будзем глядзець, як падзеі будуць развівацца далей. Мы не будзем пакідаць без адказу ні адно з дзеянняў Украіны, накіраванае супраць беларускай дзяржавы", - папярэдзіў Уладзімір Макей.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі