4 чэрвеня, Віцебск /Алеся Пушнякова - БЕЛТА/. Дзеянні заходніх краін у адносінах да Расіі і Беларусі з'яўляюцца агрэсіўнымі, але Расія, як і Беларусь, будзе адстойваць сваё права на суверэнную дзяржаву. Аб гэтым заявіў на сустрэчы з кіраўніцтвам Камітэта дзяржбяспекі Беларусі 3 чэрвеня дырэктар Службы знешняй разведкі Расійскай Федэрацыі Сяргей Нарышкін, перадае карэспандэнт БЕЛТА.
3 чэрвеня адбылося 20-е сумеснае пасяджэнне калегіі Камітэта дзяржаўнай бяспекі Рэспублікі Беларусь і Службы знешняй разведкі Расійскай Федэрацыі.
Пасля сустрэчы з кіраўніцтвам Камітэта дзяржбяспекі Сяргей Нарышкін адказаў на пытанні журналістаў. Адно з іх датычылася абмежаванняў і санкцый адносна Расіі і афіцыйнага Мінска. "Мы ацэньваем дзеянні заходніх краін як агрэсіўныя акцыі, акцыі, якія прымаюцца па-за рамкамі міжнароднага права. Павінен сказаць, што ў Расійскай Федэрацыі нашымі грамадзянамі гэтыя дзеянні ўспрымаюцца вельмі негатыўна. Сярод нашага насельніцтва расце непрымальнасць такой палітыкі заходніх краін. Я думаю, што падобныя з'явы адбываюцца і ў беларускім грамадстве. Гэта ўсё элементы гібрыднай вайны, агрэсіўныя дзеянні. Таму што тэрмін "недружалюбныя крокі" - вельмі мяккі. Гэтыя агрэсіўныя дзеянні накіраваны супраць суверэнітэту нашых краін, і мы з гэтым мірыцца не будзем. Мы стаім цвёрда на пазіцыях абароны агульначалавечых каштоўнасцей, якімі даражым, і што б ні здарылася, сваё права на суверэннае развіццё, на выбар свайго самабытнага шляху развіцця мы будзем абараняць і гэтага прытрымлівацца", - падкрэсліў Сяргей Нарышкін.-0-
