7 снежня, Мінск /Кар. БЕЛТА/. У МЗС Беларусі адбылося чарговае пасяджэнне Кансультатыўнага савета па справах беларусаў замежжа. Для ўдзелу ў ім прыехалі прадстаўнікі дыяспары з розных краін як блізкага, так і далёкага замежжа, уключаючы краіны Еўрасаюза і ЗША, перадае карэспандэнт БЕЛТА.
Намеснік міністра замежных спраў Ігар Назарук праінфармаваў удзельнікаў мерапрыемства аб падзеях, якія адбываюцца ў Беларусі і вакол яе. "Для таго, каб вы атрымалі аб'ектыўную ацэнку. Не апрацаваную сродкамі масавай інфармацыі ў вашых краінах або з падачы пэўных куратараў, а для таго, каб вы грунтаваліся на той інфармацыі, якая сапраўды заслугоўвае ўвагі. Больш таго, наколькі мне даносяць інфармацыю, у асобных краінах проста ўключаецца рэжым маўчання. Раней хаця б дрэнна гаварылі, а цяпер проста нібы нас не існуе. Вы ведаеце, мы не лепшыя за іншых - Беларусь. Мы не горшыя за іншых. Мы - іншыя. Мы ідзём сваім шляхам, у нас свой лёс. За намі Бог, і таму ўсё, што мы робім, гэта правільна", - падкрэсліў намеснік кіраўніка МЗС.
Што датычыцца самога мерапрыемства, то Ігар Назарук падкрэсліў важнасць і сімвалізм яго правядзення ў сценах МЗС, паколькі знешнепалітычныя ведамствы і дыппрадстаўніцтвы непасрэдна працуюць з беларусамі замежжа, дыяспарай. "Мы забяспечваем, па-першае, сувязь нашых людзей, якія па тых ці іншых прычынах аказаліся за межамі Радзімы. З другога боку, мы забяспечваем пераемнасць пакаленняў, перадаём па эстафеце нашы традыцыі, веды, культурныя і іншыя каштоўнасці. Мы пастаянна дзелімся з нашымі суайчыннікамі найноўшай інфармацыяй і звесткамі аб падзеях, якія адбываюцца ў нас у краіне, каб у іх было дакладнае і аб'ектыўнае ўяўленне аб рэальнасці. А не аб тым, як часам у асобных краінах або групе краін даносяць з пэўнымі прапагандысцкімі мэтамі", - сказаў прадстаўнік МЗС.
У сваім выступленні ён канстатаваў складаную сітуацыю, якая цяпер складваецца на фоне сістэмнага крызісу міжнародных адносін, паглыблення канфрантацыі, росту канфліктнага патэнцыялу паміж сусветнымі цэнтрамі сілы. "Беларусь за сваю незалежную і міралюбную палітыку апынулася пад беспрэцэдэнтным і небывалым па разнастайнасці і нават відавочным абсурдзе санкцыйным націскам", - адзначыў Ігар Назарук.
Ён акцэнтаваў увагу, што бягучы год у Беларусі аб'яўлены Годам гістарычнай памяці і гэтым фактам шмат у чым быў прадвызначаны характар узаемадзеяння з беларусамі замежжа - імкненнем надаць гэтыя акцэнты і прыцягнуць увагу і міжнароднай супольнасці да такой праблематыкі. Размова аб недапушчэнні перапісвання сапраўднай гісторыі і ўмацаванні адзінства беларускага народа. У гэтым плане важным быў удзел прадстаўнікоў дыяспары ў шэрагу праведзеных за мяжой тэматычных мерапрыемстваў. "Мы дзякуем вам за садзейнічанне ў арганізацыі кантактаў, падтрымцы ўзаемадзеяння з прадстаўнікамі палітычных, экспертных, грамадскіх колаў у замежных краінах у рамках развіцця тэматыкі Года гістарычнай памяці", - падзякаваў прадстаўнік МЗС.
Ён нагадаў, што важнай вяхой у намаганнях па развіцці на міжнароднай арэне тэмы гістарычнай праўды стала ініцыятыва па распаўсюджванні інфармацыі аб генцыдзе беларускага народа ў гады Вялікай Айчыннай вайны. "Знішчалі не толькі немцы, не толькі фашысты. Цяпер мы ўжо на гэта інакш глядзім. І мы ведаем і гісторыю Хатыні, ведаем, хто там рабіў усе гэтыя бясчынствы, ад якіх нават самыя заклятыя фашысты адварочваліся. Яны не маглі на гэта спакойна, без уздрыгу глядзець", - адзначыў Ігар Назарук.
Увазе ўдзельнікаў мерапрыемства таксама была прадстаўлена фотавыстаўка "Мы - разам! З любоўю да Беларусі", якая якраз адлюстроўвае дзейнасць арганізацый беларусаў замежжа.
У пачатку пасяджэння мінутай маўчання ўшанавалі памяць раптоўна памерлага міністра замежных спраў Беларусі Уладзіміра Макея. Папярэднія гады ён старшынстваваў на такіх сустрэчах з дыяспарай. Ігар Назарук адзначыў, што міністр вельмі любіў такі фармат сустрэч. Цяпер жа функцыі старшыні часова перайшлі першаму намесніку міністра Сяргею Алейніку, які па прычыне замежнай камандзіроўкі не змог прысутнічаць.-0-
