13 снежня, Мінск /Кар. БЕЛТА/. Намеснік міністра замежных спраў Беларусі Андрэй Дапкюнас 12 снежня сустрэўся з паслом Арменіі Арменам Гевандзянам. Бакі абмеркавалі бягучы стан і магчымасці далейшага паглыблення ўзаемадзеяння дзвюх краін у міжнародных арганізацыях, паведамілі БЕЛТА ў прэс-службе МЗС Беларусі.
Намеснік міністра і пасол адзначылі высокі ўзровень узаемнай падтрымкі і сугучнасць імкненняў Беларусі і Арменіі ў рабоце па шэрагу важных тэм міжнароднага парадку дня. Сярод асноўных напрамкаў такога ўзаемадзеяння былі адзначаны сумесныя дзеянні па паляпшэнні каардынацыі намаганняў міжнароднай супольнасці па барацьбе з гандлем людзьмі, а таксама работа на нацыянальным узроўні па ажыццяўленні Парадку дня ўстойлівага развіцця і наладжванне эфектыўнага ўзаемадзеяння нацыянальных каардынатараў Мэт устойлівага развіцця.
Асобна субяседнікі адзначылі цесную сумесную работу ў ААН у рамках групы аднадумцаў у мэтах падтрымкі краін з сярэднім узроўнем даходу, у тым ліку ў кантэксце нядаўняга пасяджэння Генеральнай асамблеі ААН высокага ўзроўню па гэтым пытанні 4 снежня 2018 года. Таксама адзначана важнасць распрацоўкі стратэгічных падыходаў для партнёрства міжнародных арганізацый з краінамі з сярэднім узроўнем даходу.
Закрануўшы пытанне беларуска-армянскага супрацоўніцтва ў галіне мірнага выкарыстання ядзернай энергіі, намеснік міністра падзякаваў армянскаму боку за абмен каштоўным вопытам правядзення стрэс-тэстаў атамных станцый па метадалогіі ЕС, а таксама плённае супрацоўніцтва дэлегацый дзвюх краін у сувязі з ажыццяўленнем Канвенцыі Еўрапейскай эканамічнай камісіі ААН аб ацэнцы ўздзеяння на навакольнае асяроддзе ў трансгранічным кантэксце (Канвенцыя Эспа).-0-