МЗС Беларусі папярэдзіла Польшчу аб недапушчальнасці правядзення варожых акцый

5 жніўня, Мінск /Кар. БЕЛТА/. Прэс-сакратар Міністэрства замежных спраў Беларусі Руслан Варанкоў выступіў з заявай у сувязі з запланаваным правядзеннем у Варшаве дэструктыўнага мерапрыемства, перадае карэспандэнт БЕЛТА.

"Паводле існуючых у Міністэрстве замежных спраў звестак, 9-10 жніўня ў Варшаве, на плошчы імя Пілсудскага, а таксама ў Варшаўскім універсітэце, запланавана правядзенне мерапрыемства, мэта якога - нанясенне шкоды Рэспубліцы Беларусь. Арганізатарамі і актыўнымі ўдзельнікамі выступаюць прадстаўнікі беларускай эміграцыі, якія падтрымліваюцца афіцыйнай Варшавай і вядомыя сваёй дэструктыўнай і правакацыйнай дзейнасцю. Міністэрства зыходзіць з таго, што падобныя варожыя акцыі не садзейнічаюць аднаўленню нармальнага дыялогу паміж нашымі дзяржавамі і адкрыта шкодзяць беларуска-польскім адносінам", - сказаў Руслан Варанкоў.

У сувязі з гэтым у Міністэрства замежных спраў быў выкліканы часовы павераны ў справах Рэспублікі Польшча ў Рэспубліцы Беларусь, якому ўручана адпаведная нота.

"Міністэрства замежных спраў Рэспублікі Беларусь будзе і далей уважліва адсочваць развіццё сітуацыі, пакідаючы за сабой права прымаць неабходныя меры ў адказ на любыя дзеянні правакацыйнага характару", - падкрэсліў прэс-сакратар знешнепалітычнага ведамства.-0-