1 чэрвеня, Мінск /Кар. БЕЛТА/. Беларускі бок паабяцаў абавязковы асіметрычны адказ у сувязі з пачаткам прымянення Польшчай новых абмежаванняў на беларуска-польскай граніцы. Аб гэтым гаворыцца ў адпаведным каментарыі прэс-сакратара МЗС Анатоля Глаза, паведамляе БЕЛТА.
"Мы заяўлялі раней, што польскае кіраўніцтва сваімі рукамі стварае ўсё новыя перашкоды і нечалавечыя ўмовы для грамадзян Беларусі і Польшчы, а таксама перавозчыкаў усёй еўразійскай прасторы. На ім ляжыць уся віна за антыгуманныя наступствы такіх крокаў. У сувязі з гэтым цалкам зразумела справядлівае абурэнне прадпрымальнікаў і грамадзян Польшчы ў прыгранічных абласцях", - адзначыў Анатоль Глаз.
Паводле яго слоў, МЗС не раз гаварыла аб тым, што рэжым Дуды - Маравецкага планамерна рэалізуе комплекс антыбеларускіх крокаў. "Яны накіраваны на правакацыю ўскладненняў і эскалацыю, уключаючы ўвесь рэгіён. У сувязі з гэтым чарговыя маніпуляцыі з перасячэннем граніцы былі для нас чаканымі. Рашэнні ўрада Польшчы таксама паказваюць, што базавыя правы чалавека, у тым ліку права на свабоду перамяшчэння, на справе для іх нічога не значаць, - падкрэслілі ў МЗС. - На гэтыя меры ў абавязковым парадку будзе асіметрычны адказ. Пры гэтым намі будуць у максімальна магчымай ступені ўлічаны інтарэсы простых палякаў, вымушаных пакутаваць з-за валюнтарызму свайго ўрада, і ў максімальнай - інтарэсы нашых грамадзян".
Беларускі бок з'яўляецца адказным іграком у сваім рэгіёне, не мае намеру паддавацца на падкідваемыя правакацыі, а будзе рэагаваць спакойна, планамерна і з годнасцю, звярнулі ўвагу ў МЗС.
Заявы членаў польскага ўрада аб прычынах іх антыгуманных крокаў у МЗС назвалі "маніпуляцыямі, накіраванымі на нядобрасумленную эксплуатацыю цалкам зразумелых эмоцый польскіх грамадзян". У Беларусі не прыгнятаецца ні адна з нацыянальных меншасцей, усе грамадзяне розных нацыянальнасцей жывуць у міры і згодзе, у чым можа пераканацца любы паляк, наведаўшы нашу краіну ў бязвізавым рэжыме.
"Сцвярджэнне міністра замежных спраў Польшчы, якое прагучала ў Сейме, аб "зробленых уладам Беларусі прапановах, накіраваных на павелічэнне прасторы для палітычнага манеўру", не адпавядае рэчаіснасці. За апошнія гады польскае кіраўніцтва агучвае толькі першапачаткова непрымальныя для любой паважаючай сябе суверэннай дзяржавы ўльтыматумы, спрабуе адкрыта ўмешвацца ў дзейнасць судовай сістэмы і іншыя ўнутраныя справы Рэспублікі Беларусь. Любыя спробы шантажу і націску заўсёды будуць асуджаны на правал у адносінах да незалежнай Беларусі", - канстатаваў Анатоль Глаз.
Ён нагадаў, што ў стандартны набор польскай знешняй палітыкі ў апошнія гады цесна ўвайшлі падрыхтоўка і вярбоўка на тэрыторыі Польшчы ваенізаваных фарміраванняў для ўчынення тэрарыстычных актаў у Беларусі, утрыманне за кошт сродкаў простых польскіх грамадзян структур, чыімі адкрытымі мэтамі з'яўляецца насільная змена ўлады ў Беларусі. Тут жа знішчэнне бежанцаў і мігрантаў з паўднёвых краін, якія перамяшчаюцца праз Польшчу ў Еўропу, калючы дрот супраць людзей і дзікіх жывёл у Белавежскай пушчы цаной паўмільярда долараў з кішэні польскіх падаткаплацельшчыкаў. У гэтым спісе таксама пагаршэнне ўмоў транзіту для пан'еўразійскіх транспартных перавозак і непасрэдны ўдзел у вайне на баку кіеўскага рэжыму.
"На фоне гэтага "цывілізаванага" набору прадстаўнікі польскага кіраўніцтва заяўляюць, што "Польшча для Беларусі з'яўляецца акном у свет". Здаецца, рэжым Дуды - Маравецкага настолькі паверыў у сваю выключнасць і беспакаранасць, што ўжо адкрыта гаворыць пра сваю перавагу і не здольны выбудоўваць дыялог з суседзямі. Гэта вельмі небяспечная тэндэнцыя", - перакананы прэс-сакратар МЗС.
"Беларускі бок гатовы да ўзаемапаважлівага дыялогу з польскім бокам без ультыматумаў і папярэдніх умоў і разгледзіць рэальныя прапановы, накіраваныя на дээскалацыю і ўзаемавыгаднае вырашэнне надзённых пытанняў".-0-
