Сцяг Субота, 15 чэрвеня 2024
Усе навіны
Усе навіны
Палітыка
16 снежня 2022, 11:52

Міцкевіч: паміж парламентамі Беларусі і Казахстана створана атмасфера даверу і дружбы

16 снежня, Мінск /Кар. БЕЛТА/. Паміж парламентамі Беларусі і Казахстана створана атмасфера даверу і дружбы, заявіў намеснік старшыні Палаты прадстаўнікоў Валерый Міцкевіч у час сустрэчы з дэлегацыяй Мажыліса парламента Рэспублікі Казахстан у рамках яе візіту ў Беларусь, перадае карэспандэнт БЕЛТА.

"Хачу вас павіншаваць з Днём Незалежнасці Казахстана. Гэта вельмі знамянальны дзень, і, вядома, мы вельмі рады, што ў гэты дзень вы знаходзіцеся на беларускай зямлі, - сказаў Валерый Міцкевіч. - Зусім нядаўна ў вас прайшла выбарчая кампанія па выбарах прэзідэнта. Як мы ведаем, усё прайшло на вельмі высокім узроўні. У нас цяпер адбываюцца ў пэўнай ступені падобныя працэсы, мы працуем над стварэннем заканадаўчай базы па Усебеларускім народным сходзе. Ведаем, што ў вас ужо створаны Нацыянальны курултай. Мы, калі працавалі над праектам змяненняў у Канстытуцыю, над стварэннем гэтага важнейшага для нас органа, шукалі міжнародны вопыт. Глядзелі, што адбываецца ў нашых дружалюбных краінах і, вядома ж, у Казахстане, таму што ў нас вельмі шмат агульных працэсаў".

Паводле яго слоў, склаўся вельмі добры дыялог паміж парламентамі дзвюх краін. "Створана атмасфера даверу, я сказаў бы, дружбы. У нас з візітам была дэлегацыя парламента Казахстана ў чэрвені. Мы праводзілі канферэнцыю "Гістарычная памяць: Вялікая Перамога, здабытая адзінствам". Яна сапраўды здабыта адзінствам. У свой час нашы народы сумесна павярнулі ход гісторыі, адстаяўшы сваю незалежнасць цаной вялікіх ахвяр. І таму нам трэба прадаўжаць і ў далейшым работу па захаванні гістарычнай памяці, таму што гэта наша агульная гісторыя", - адзначыў віцэ-спікер.

"У нашым міжпарламенцкім супрацоўніцтве, я лічу, нам трэба больш увагі ўдзяляць эканамічнаму ўзаемадзеянню, таму што гэта база. І, вядома, чым большае ўзаемнае пранікненне эканомік, бізнесу, адпаведна, тым лепшыя і палітычныя ўзаемаадносіны. На тэрыторыі Казахстана працуе 7 нашых сумесных прадпрыемстваў. Спадзяюся, учора вам удалося паглядзець, як працуе адзін з флагманаў нашай прамысловасці - МАЗ. Сёння мы вам пакажам яшчэ сельскагаспадарчае прадпрыемства. У нас вельмі вялікія перспектывы супрацоўніцтва ў галіне сельскай гаспадаркі, экспарту-імпарту сельскагаспадарчай прадукцыі. У нас ёсць добры вопыт у гэтым плане. Мы, вядома, рады будзем падзяліцца з Казахстанам. Гэта толькі на карысць нашаму ўзаемадзеянню, нашым эканомікам, нашым народам", - падкрэсліў Валерый Міцкевіч.

"Вельмі актыўна мы працуем у рамках АДКБ. Мы заўсёды падтрымліваем адзін аднаго на розных пляцоўках. Я хацеў бы падзякаваць за гэта Казахстану. Спадзяюся, што гэта будзе прадоўжана ў будучым з карысцю для нашых дзвюх краін, - дадаў віцэ-спікер. - Спадзяюся, што вы паедзеце з Беларусі толькі з пазітыўнымі эмоцыямі".

Плануецца, што ў ходзе сустрэчы бакі абмяркуюць развіццё міжпарламенцкіх кантактаў, супрацоўніцтва паміж заканадаўчымі органамі абедзвюх краін на міжнародных пляцоўках, пытанні садзейнічання паглыбленню беларуска-казахстанскіх сувязей у гандлёва-эканамічнай і гуманітарнай галінах.

Парламенцкая дэлегацыя Рэспублікі Казахстан наведвае Беларусь 15-16 снежня. У плане - наведванне Мінскага аўтамабільнага завода, агракамбіната "Дзяржынскі", азнаямленне з прадукцыяй прадпрыемстваў Беларускага дзяржаўнага канцэрна па вытворчасці і рэалізацыі тавараў лёгкай прамысловасці.-0-

Падпісвайцеся на нас у
Twitter
Топ-навіны
Свежыя навіны Беларусі