14 верасня, Мінск /Кар. БЕЛТА/. Беларусь надае вялікае значэнне развіццю адносін з Саудаўскай Аравіяй, заявіў намеснік старшыні Палаты прадстаўнікоў Валерый Міцкевіч у час сустрэчы з Надзвычайным і Паўнамоцным Паслом Саудаўскай Аравіі ў Расійскай Федэрацыі і Рэспубліцы Беларусь па сумяшчальніцтве Абдулрахманам Сулейманам аль-Ахмадам у рамках яго рабочага візіту ў Беларусь, перадае карэспандэнт БЕЛТА.
"У студзені гэтага года вы сустракаліся са старшынёй Палаты прадстаўнікоў Уладзімірам Андрэйчанкам. Ваша сустрэча прайшла ў дружалюбнай абстаноўцы і была вельмі карыснай. Спадзяюся, што наша сённяшняя сустрэча будзе не менш карыснай. Нам вядома роля Саудаўскай Аравіі ў міжнародных адносінах. Мы надаём вялікае значэнне развіццю нашых адносін з каралеўствам, і асабліва па парламенцкай лініі, як аднаму з элементаў актывізацыі нашых міжнародных адносін", - сказаў Валерый Міцкевіч.
Сёння як ніколі палітыкам, дыпламатам і асабліва парламентарыям вельмі карысна весці ўзаемны дыялог, адзначыў віцэ-спікер. "Абстаноўка цяпер у свеце даволі складаная і неспакойная. Нашы краіны зацікаўлены ва ўмацаванні як рэгіянальнай, так і глабальнай бяспекі, а таксама стратэгічнай стабільнасці. У сувязі з гэтым хачу прыцягнуць вашу ўвагу да ініцыятывы Прэзідэнта Беларусі Аляксандра Лукашэнкі па стварэнні механізма па ўмацаванні міру і бяспекі, фарміраванні новага глабальнага светапарадку на аснове прынцыпаў ААН. Лічу, што ў гэтым рэчышчы было б карысна правесці міжпарламенцкія кансультацыі на ўзроўні камісій па міжнародных справах або ж груп дружбы, - падкрэсліў ён. - Мы гатовы да ўзаемадзеяння ва ўсіх міжнародных фарматах і міжнародных арганізацыях. Увогуле мы гатовы да любых карысных кантактаў, любой карыснай работы, якія пойдуць на карысць нашых дзяржаў і народаў".
У сваю чаргу пасол падзякаваў беларускаму боку за магчымасць сустрэчы ў парламенце. Абдулрахман Сулейман аль-Ахмад адзначыў, што з-за COVID-19 супрацоўніцтва паміж краінамі развівалася не так актыўна, але цяпер ёсць усе магчымасці для яго актывізацыі.-0-
