1 лютага, Мінск /Кар. БЕЛТА/. Місію наглядальнікаў ад СНД на рэспубліканскім рэферэндуме па пытанні ўнясення змяненняў і дапаўненняў у Канстытуцыю Беларусі ўзначаліць намеснік старшыні Выканаўчага камітэта - выканаўчага сакратара СНД Ільхом Нематаў. Аб гэтым паведаміў журналістам першы намеснік старшыні Выканаўчага камітэта - выканаўчага сакратара СНД Леанід Анфімаў па выніках сустрэчы са старшынёй Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў Ігарам Карпенкам, перадае карэспандэнт БЕЛТА.
Ільхом Нематаў - гэта вопытны палітык, у якога за плячамі служба паслом Узбекістана ў Расіі, Злучаных Штатах Амерыкі, Індыі, работа ў якасці першага намесніка міністра замежных спраў Узбекістана. Ужо на гэтай пасадзе ён двойчы ўзначальваў місіі наглядальнікаў ад СНД на выбарах у Арменіі і Расіі. Яго кандыдатура ўзгоднена Саветам пастаянных паўнамоцных прадстаўнікоў дзяржаў - удзельніц Садружнасці пры статутных і іншых органах Садружнасці.
Работа місіі наглядальнікаў ад СНД будзе выбудоўвацца, як і ва ўсіх папярэдніх кампаніях, на прынцыпах палітычнай нейтральнасці, неўмяшання ў выбарчы працэс і ва ўнутраныя справы дзяржавы, строга ў адпаведнасці з беларускім заканадаўствам.
Прэзідэнт Беларусі 20 студзеня падпісаў указ "Аб назначэнні рэспубліканскага рэферэндуму". Асноўны дзень галасавання назначаны на 27 лютага. Прагаласаваць за змяненні і дапаўненні ў Асноўны закон можна будзе і датэрмінова: з 22 па 26 лютага ўключна.-0-
