27 сакавіка, Мінск /Кар. БЕЛТА/. У Саюзнай дзяржавы вялікая будучыня ў шматпалярнай міжнароднай архітэктуры. Такое меркаванне выказаў прэм'ер-міністр Расійскай Федэрацыі Міхаіл Мішусцін на пасяджэнні Савета Міністраў Саюзнай дзяржавы ў Маскве, паведамляе карэспандэнт БЕЛТА.
Міхаіл Мішусцін адзначыў, што кіраўнікі ўрадаў сустрэліся напярэдадні важнага свята, якое пройдзе 2 красавіка, - Дня яднання народаў Беларусі і Расіі. "Чвэрць стагоддзя таму ў гэты дзень быў падпісаны дагавор аб стварэнні супольніцтва нашых краін. Ён адкрыў новую старонку агульнай гісторыі і паслужыў пачаткам інтэграцыйнай гісторыі ў Саюзнай дзяржаве. Рашэнне аб яго фарміраванні было правільным і апраўдала сябе, - адзначыў ён. - Насуперак нестабільнасці на глабальных рынках і санкцыйнай агрэсіі калектыўнага Захаду, у нашага супрацоўніцтва добрыя паказчыкі. Пасля істотнага росту ў 2021 годзе на 35 працэнтаў узаемны гандаль павялічыўся яшчэ на 12 працэнтаў і дасягнуў рэкорднага паказчыка $45 млрд. Мы разам прадаўжаем прымаць меры для нівеліравання негатыўных наступстваў санкцый".
Расія аказала падтрымку Беларусі ва ўмацаванні фінансавай устойлівасці, прадаставіла прэферэнцыі ў пастаўках энергарэсурсаў, дапамагла наладзіць альтэрнатыўныя маршруты транзітаў у дружалюбныя дзяржавы з выкарыстаннем расійскай транспартнай інфраструктуры. Бакі таксама нарошчваюць прамысловую кааперацыю.
Міхаіл Мішусцін дадаў, што ў лістападзе 2021 года прэзідэнтамі Беларусі і Расіі было прынята рашэнне аб паглыбленні інтэграцыі і адобраны 28 саюзных праграм. "Мы заклалі аснову для правядзення скаардынаванай макраэканамічнай, аграрнай і прамысловай палітыкі, фарміруем агульны транспартны рынак, правілы канкурэнцыі і забеспячэння роўных правоў спажыўцоў. Мы дзейнічаем скаардынавана, на сённяшні дзень выканана дзве трэці мерапрыемстваў. Таксама вырашаюцца задачы па стварэнні спрыяльнага дзелавога клімату і паслядоўна ўстараняюцца бар'еры і абмежаванні на шляху свабоднага перамяшчэння тавараў, паслуг, капіталаў і рабочай сілы", - расказаў ён.
На думку прэм'ер-міністра Расіі, у Саюзнай дзяржавы вялікая будучыня ў шматпалярнай міжнароднай архітэктуры, якая фарміруецца. "Паглыбленне інтэграцыі паслужыць на карысць народаў нашых краін. Вынікам сённяшняй работы стане падрыхтоўка да маючага адбыцца пасяджэння Вышэйшага дзяржаўнага савета Саюзнай дзяржавы з удзелам нашых прэзідэнтаў", - дадаў ён.
Кіраўнік расійскага ўрада звярнуў увагу, што лепшыя практыкі расійска-беларускага вопыту варта прапанаваць краінам-суседзям па Еўразійскім эканамічным саюзе і Садружнасці Незалежных Дзяржаў.-0-
