26 сакавіка, Мінск /Кар. БЕЛТА/. У сучасных умовах і пры тым узроўні знешняга націску, што зведваюць Беларусь і Расія, яны павінны больш цесна супрацоўнічаць, аб'яднаўшы намаганні. Аб гэтым па выніках сустрэчы з Прэзідэнтам Беларусі заявіў журналістам Дзмітрый Мезенцаў,які завяршае сваю дыпламатычную місію ў якасці пасла Расіі ў Беларусі ў сувязі з нядаўнім назначэннем дзяржаўным сакратаром Саюзнай дзяржавы, перадае карэспандэнт БЕЛТА.
Паводле яго слоў, у час гутаркі бакі выказалі адзіныя падыходы наконт пошуку фарматаў эканамічнай інтэграцыі, па вывядзенні значнай колькасці планаў і праектаў на ўзровень Саюзнай дзяржавы. Адным з прыкладаў такіх праектаў можа быць распрацоўка спадарожніка дыстанцыйнага зандзіравання Зямлі з унікальнымі характарыстыкамі, над якім працуюць спецыялісты Беларусі і Расіі.
Дзмітрый Мезенцаў падкрэсліў, што за час існавання Саюзнай дзяржавы было шмат зроблена. "Але час і знешні націск, заходні санкцыйны націск, патрабуюць ад нас быць больш рэзультатыўнымі, больш канкурэнтаздольнымі. У тым ліку і таму, што посткавідны свет будзе больш жорсткім і краіны-лідары, якія хочуць вярнуць і ўмацаваць свае пазіцыі, напэўна, не будуць асабліва ўдзяляць увагу нашым запытам. І ў гэтым плане толькі аб'яднанне ў рамках Саюзнай дзяржавы, ЕАЭС, умацаванне супрацоўніцтва ў рамках СНД ёсць адзіны магчымы паспяховы адказ на той націск, які мы чакаем. Не палітычны, а эканамічны", - упэўнены ён.
Адказваючы на просьбу журналістаў ацаніць вынікі работы на чале расійскай дыпламатычнай місіі ў Беларусі, Дзмітрый Мезенцаў сказаў, што рабіць гэта самому "не зусім ёмка і карэктна". "Але яшчэ раз хачу сказаць, што і калектыў пасольства, і калектыў Міністэрства замежных спраў, і ўсіх без выключэння федэральных расійскіх ведамстваў рабілі ўсё магчымае, каб мы былі бліжэйшымі адзін да аднаго", - падкрэсліў ён.
"Вы ведаеце, што па прафесійным, эканамічным парадку дня былі спрэчкі (паміж беларускім і расійскім бакамі. - Заўвага БЕЛТА), непаразуменне. Але сёння відавочны іншы ўзровень супрацоўніцтва і гатоўнасці чуць аргументы адзін аднаго. Не для таго, каб толькі план продажу той ці іншай прадукцыі, пастаўкі нафтапрадуктаў або іншых тавараў вырашыць дзеля прыбытку прадпрыемства ў бліжэйшыя дні або месяцы. Мы сёння гаворым пра больш глыбокую стратэгію супрацоўніцтва", - дадаў Дзмітрый Мезенцаў.-0-
