16 красавіка, Мінск /Кар. БЕЛТА/. Маральны абавязак цяперашняга і будучага пакаленняў - з павагай да паўшых і гордасцю несці сцяг Вялікай Перамогі і захаваць гістарычную праўду аб Вялікай Айчыннай вайне. Аб гэтым гаворыцца ў заяве Нацыянальнага сходу ў сувязі з 75-годдзем Вялікай Перамогі, якую разгледзела сёння Палата прадстаўнікоў, перадае карэспандэнт БЕЛТА.
Заяву агучыла намеснік старшыні Пастаяннай камісіі па правах чалавека, нацыянальных адносінах і СМІ Лілія Ананіч.
Уклад беларускага народа ў Вялікую Перамогу ўвекавечаны ў гісторыі. "Беларусы плячо ў плячо разам з іншымі народамі Савецкага Саюза кавалі Перамогу на франтах Вялікай Айчыннай вайны", - гаворыцца ў заяве. У ёй таксама адзначаецца, што беларускі партызанскі рух стаў унікальным прыкладам сапраўднага народнага супраціўлення, мужнасці і самаахвярнасці.
Галоўны лейтматыў гэтай заявы ў тым, што Вялікая Перамога свяшчэнная, не падлягае забыццю і перагляду. Яна павінна заставацца ў свядомасці цяперашняга і будучых пакаленняў беларусаў, народаў свету як важнейшы маральны арыенцір.
"Заява падрыхтавана, таму што мы не можам быць абыякавымі да спроб перапісаць гісторыю, укінуць у медыйную прастору іншыя ацэнкі Вялікай Перамогі. Мы яе наследнікі і маем дачыненне да яе праз лёсы бацькаў, дзядоў", - падкрэсліла Лілія Ананіч, адказваючы на пытанні журналістаў.
"Сёння наша чарга несці эстафету памяці і клапаціцца аб тым, каб і будучае пакаленне беларусаў таксама свята шанавала Вялікую Перамогу і было ўдзячна за шчасце і права жыць пад мірным небам", - сказала яна.-0-
