14 кастрычніка, Астана /Кар. БЕЛТА/. Знешнія сілы імкнуцца расчляніць інтэграцыю на постсавецкай прасторы. Аб гэтым заявіў міністр замежных спраў Беларусі Уладзімір Макей у кулуарах саміту СНД у Астане, перадае карэспандэнт БЕЛТА.
"Вы бачыце, што адбываецца вакол: свет ашалеў, свет непрадказальны. Таму дзяржавы постсавецкай прасторы павінны трымацца разам", - перакананы Уладзімір Макей.
Паводле яго слоў, актуальнасць пляцоўкі СНД сёння ўзрастае як ніколі. "Як бы хто ні адмаўляў, нас звязвае агульнае мінулае. У нас шмат агульнага. Не толькі эканамічнага парадку, але і чалавечыя кантакты. Шмат агульнага і ў палітычным плане. Пасля таго, як многія дзяржавы атрымалі самастойнасць, у кожнага з'явіліся свае нацыянальныя інтарэсы. А сёння гэта нацыянальнае яшчэ больш падаграваецца асобнымі знешнімі сіламі, якія імкнуцца расчляніць інтэграцыйныя структуры на постсавецкай прасторы, каб нашы краіны былі разрозненымі, каб мы не адчувалі сябе нечым адзіным і не маглі процістаяць таму санкцыйнаму неразумнаму націску, які зыходзіць звонку", - заявіў міністр.
"Цяпер трэба вызначыць, што галоўнае. Калі нам гавораць, што "давайце займацца правамі чалавека", вядома, трэба займацца правамі чалавека. Але правы чалавека могуць быць забяспечаны дастойна толькі толькі ва ўмовах нармальнага развіцця эканомікі, грамадства і дзяржавы. І ў нармальных умовах бяспекі. Дык давайце вызначым, што сёння галоўнае: ці права выйсці на плошчу і крычаць "Далоў x, y, z!", ці ўсё ж задумацца над тым, што наша планета коціцца ў бездань, трэба спыніць гэта падзенне", - дадаў Уладзімір Макей.-0-
