22 чэрвеня, Мінск /Аліна Грышкевіч - БЕЛТА/. Міністр замежных спраў Уладзімір Макей 22 чэрвеня прыняў Надзвычайнага і Паўнамоцнага Пасла Сербіі ў Беларусі Велька Кавачавіча ў сувязі з завяршэннем яго дыпламатычнай місіі ў Беларусі, паведамілі БЕЛТА ў прэс-службе знешнепалітычнага ведамства.
Бакі падвялі вынікі беларуска-сербскага ўзаемадзеяння, канстатавалі яго дружалюбны характар і адзначылі вялікі патэнцыял да пашырэння двухбаковага ўзаемавыгаднага партнёрства. Уладзімір Макей падзякаваў кіраўніку сербскай дыпламатычнай місіі за сумесную плённую работу па актывізацыі дыялогу.
Міністр адзначыў, што перададзеная Беларусі 21-22 чэрвеня сербская гуманітарная дапамога для барацьбы з распаўсюджваннем каранавіруса з'яўляецца важным жэстам падтрымкі з боку братэрскага сербскага народа.
За асабісты ўклад ва ўмацаванне і развіццё супрацоўніцтва паміж Беларуссю і Сербіяй Велька Кавачавіч быў адзначаны знакам узнагароды органаў дыпламатычнай службы Беларусі "Партнёрства".-0-