16 лютага, Мінск /Кар. БЕЛТА/. Даўно наспела неабходнасць у рамках АБСЕ арганізаваць поўнамаштабную сустрэчу кіраўнікоў дзяржаў. Аб гэтым міністр замежных спраў Уладзімір Макей заявіў сёння на прэс-канферэнцыі ў Мінску, перадае карэспандэнт БЕЛТА.
"Нягледзячы на тое, што заходнія палітыкі наведалі Маскву, сустрэліся з Прэзідэнтам Пуціным, зрабілі адпаведныя заявы ў час прэс-канферэнцый, нягледзячы на тое, што з Масквы, з Мінска гучаць пастаянныя заявы, што ніхто ніякай пагрозы для суседніх дзяржаў не ўяўляе, спекуляцыі прадаўжаюцца (на тэму магчымай расійскай агрэсіі. - Заўвага БЕЛТА)", - адзначыў Уладзімір Макей.
Паводле яго слоў, адсутнасць даверу паміж бакамі прыводзіць да таго, што сітуацыя не можа нармалізавацца. "Адсутнасць нейкіх сустрэч, якія садзейнічалі б нармалізацыі сітуацыі, таксама з'яўляецца нашым вялікім недахопам", - лічыць міністр.
Ён, у прыватнасці, нагадаў, што Прэзідэнт Беларусі даўно выступіў з ініцыятывай шырокамаштабнага міжнароднага дыялогу "Хельсінкі-2". Спачатку гэта на міжнародным узроўні ўспрымалася скептычна, а потым аказалася, што ідэя правільная і запатрабаваная.
"Мы лічым, што даўно наспела неабходнасць у рамках той жа самай АБСЕ арганізаваць поўнамаштабную сустрэчу кіраўнікоў дзяржаў. Яна прывяла б да аднаўлення пэўнага ўзроўню даверу паміж краінамі, якія цяпер падзелены на "нашы" і "не нашы". Мы заўсёды выступалі за дыялог. Лічым, што толькі праз дыялог можна вырашаць усе пытанні", - сказаў Уладзімір Макей.-0-